WILLEMSTAD.- Dos supermerkado kada un a haña un but di 5000 florin pa inkumplimentu ku lei di emergensia ku gobièrnu a dekretá den kuadro di e pandemia di COVID-19.
Djasabra último, 24 di aprel, e Tim Mutidisiplinaro a bolbe subi kaya pa hasi kontròl riba establesimentunan riba kumplimentu di e lei di emergensia. Manera ariba indiká dos but basta pisá a kai pa dos supermerkado.
Tambe e tim mester a desmantelá na 4 establesimentu grupo di personanan sintá dilanti dje establesimentu, miéntras esakinan tabata será.
Na un minimarket riba Andres Belloweg 75, a duna but pa dunamentu servisio na kliente despues di orario di sera ku ta 6’or di atardi.
Den un supermerkado despues di 6'or di atardi ainda tabata tin kliente den e establesimentu hasiendo kompra, miéntras orario pa establesimentunan sera ta 6’or di atardi. P’esei e supermerkado aki a risibí un but di 5000 florin.
Na otro supermerkado den área di Brievengat a duna 5000 florin di but p’e echo ku a permití tur kliente primi drenta paden, debí ku orario di sera tabata yegando. Asina a krea un situashon ku tabata imposibel pa e klientenan por a mantené distansia físiko pa ku otro.
Na un otro supermarket den área di Abrahams a duna gerensia un aviso pa ku limpiesa konsistente di e garoshinan. Tambe a pidi e doño pa pone un persona na porta ku ta kontrolá si tur kliente ta drenta e supermarket ku tapaboka.
Otro supermarket den área di Saliña a haña aviso pa no tin un maneho konsistente pa ku limpiamentu di e garoshinan den e establesimentu.
Un nota positivo di Mangusa Hypermarket ta ku e propietario a krea un fasilidat den airu kondishoná, teniendo kuenta ku protokòl di COVID-19, pa e personanan ku ta tin ku warda nan turno. P’asina evitá ku nan tin ku keda warda pafó den solo.