Shofùr tabata kore ku kopia di reibeweis

WILLEMSTAD.-  Durante di un kaso di infrakshon di tráfiko hues a bai di akuerdo ku fiskal ku e demanda di 50 florin pa hòmber shofùr ku no tabatin su papel di seguro kuné ni tampoko su reibeweis dia ku polis a par’é.

E tabata kore ku kopia di su reibeweis, mirando ku el a pèrdè esaki.

E shofùr ta keda akusá di no tabatin e dokumentonan nesesario pa su vehíkulo kore riba karetera públiko.

Na momento ku polisnan a par’e riba kontròl di faha su dokumentonan no tabata válido.

Segun fiskal e papel di seguro ku e shofùr tabata kore kuné, a kaduká un luna promé.

E shofùr a bin korte pa motibu ku e no tabata satisfecho ku e but ku el a risibí.

El a bisa ku su seguro a kaduká un luna promé bèrdat, pero ku e kompania di seguro ta duna 30 dia pa kanselá i pa nan prosesá e sistema di pago.

Segun e shofùr, e mester a bai tuma su seguro pero no a haña chèns di hasi esaki.

Pa loke ta trata su reibeweis, el a splika ku el a pèrd’é.

Durante tratamentu di e kaso e akusado a trese tur su papelnan válido i tambe reibeweis, ku despues el a sòru pone nan na òrdu.

Mirando esakinan fiskal a bisa di ta dun’é un chèns i a demand’é na un but di 50 florin.

Fiskal a duna di konosé ku un but pa reibeweis normal ta fl 275,-  i seguro fl 500,-.

Na tur e akusado lo mester a paga fl 750,-.

Segun fiskal pa e biaha aki nan lo tene konsiderashon, mirando e sistema di seguro ku en bèrdat, ta duna 30 dia di tempu pa prosesá e pago.

Hues den su desishon a splika e akusado ku e ta sugirí pa otro bia e kanselá su seguro mas tempran i no warda te ora e kaduká e  hasié.

Na final hues a bai kompletamente di akuerdo ku fiskal.