WILLEMSTAD,- Hopi outomobilista ku ta pasa riba riba Nieuwe Haven diariamente, no ta na altura ku tin un bòrchi ku ta indiká ku e máksimo ku por kore riba e kartera ei , ta 60 kilometer.
Hopi ta konsiderá Nieuwe Haven komo un “High way” chikí di Kòrsou , pero realidat esaki no ta e kaso.
Un shofùr despues di a haña but pa kore ku velosidat haltu riba Nieuwe Haven, a bin korte pa e splika di su banda.
El a splika, ku tur dia e ta hasi uzo di e karetera ei i hamas a mira un bòrchi ku ta indiká, ku e máksimo ku por kore ta 60 kilometer.
Segun e prosèsverbal e tabata kore riba 90 kilometer pa ora.
E shofùr a duna di konos’é ku no e so, pero mayoria hende ku el a puntra, ku ta hasi uzo di e karetera ei, ta bisa ku nan no sa ku no por kore mas ku 60 kilometer pa ora riba Nieuwe Haven.
Segun e shofùr, esnan konserní mester pone e bòrchi mas visibel òf algu ku por mira di aleu, ku no por kore mas di e kilometer stipulá.
Fiskal ta haña e akusashon probá i ta bisa ku e but pa ku e infrakshon aki ta kosta 100 florin.
Segun fiskal, e ta tene kuenta ku e loke e shofùr a trese dilanti i tambe su situashon finansiero ku aktualmente e no tin un trabou.
Mirando esaki fiskal ta redusí e but i ta bah’é na 50 florin kondishonal, ku un periodo di prueba di 1 aña.
Esaki ta nifiká ku si e shofùr bolbe kometé kualke infrakshon den tráfiko, e lo tin ku paga e multa aki huntu ku esun nobo ku e lo haña.