Buurtzorg, aktivo den mas ku 30 pais kaba, awor ta bin Kòrsou

WILLEMSTAD.- Buurtzorg ta un konsepto ku a wòrdu fundá for di aña 2006 na Hulanda. E ta duna kuido na kas pa hende grandi, òf hende ku a sali for di hospital i ku no por yuda su mes. Of pa hende ku ke sigui biba independiente na kas i mester tin yudansa. Segun sra. Dalila Trinidad Buurtzorg ta un konsepto basta amplio i hopi eksitoso. Sra. Dalila Trinidad ta direktor di Buurtzorg Caribbean. E ta splika ku Buurtzorg a keda fundá dor di enfermero Jos de Blok na Hulanda den aña 2006. Awor Buurtzorg ta aktivo den mas ku 30 pais rònt mundu, manera Fransia, Brasil, Australia i Taiwan. Segun sra Trinidad ta hopi importante ku hende ta na altura ku Buurtzorg for di awor tambe ta aktivo na Kòrsou, Aruba i Sint Maarten tambe.

‘Konektá ku e pashènt’
Jos de Blok, ku ta CEO di Buurtzorg, a finalisá e estudio pa enfermero. ‘Mi a traha komo enfermero promé ku mi a lansa e kompania.’ Segun De Blok den sektor di kuido ta hopi importante pa konektá ku e pashènt. ‘Na mi konsepto un profeshonal den kuido tin ku realisá kiko ta e nesesidat di e pashènt.’
De Blok ta splika ku su intenshon ku Buurtzorg tabata pa krea un ambiente na unda enfermeronan huntu ku e pashènt ku tin nesesidat, huntu ku e hende grandi ku ke sigui biba den su mes kas, pero tambe huntu ku e pashènt terminal, ku huntu nan ta disidí kiko ta nesesario i kiko ta e nesesidat. Banda di esei segun De Blok ta importante ku un pashènt ta keda ku e mesun enfermero òf enfermera pa tempu largu. ‘Mi no ke ku kada bia e pashènt ta haña un otro persona. Pa pashèntnan ta importante ku nan ta konosé nan enfermero, i pa e famia di e pashènt ta importante ku no kada bia nan tin ku splika kiko ta importante pa e pashènt i kiko ta su situashon. Pa esaki ta meta di Buurtzorg ku pashènt ta sigui haña kuido for di e mesun enfermero òf enfermera pa basta tempu.’

Buurtzorg ta evitá burokrasia
De Blok ta splika ku Buurtzorg ta traha ku ‘zelfsturende teams’, ku ta timnan ku ta guia nan mes. Tur enfermero i enfermera den e tim huntu tin e responsabilidat pa duna e mihó kuido posibel. Buurtzorg no ta traha ku hopi mènedjer i trahadó den ofisina. ‘Nos ke evitá burokrasia pasobra segun nos esaki ta stroba nos meta pa ofresé e mihó kuido posibel.’
Den e timnan ku ta guiá nan mes, enfermeronan i enfermeranan ta traha huntu. Huntu nan ta responsabel pa e trabou ku nan tin ku hasi. Segun De Blok esaki ta funshoná hopi bon. De Blok: ‘Den kuido no ta nesesario pa traha ku hopi mènedjer. Mi sa ku den kuido enfermeronan i enfermeranan por tuma nan responsabilidat. Nan sa ku nan tin un trabou ku hopi responsabilidat. Ta mi eksperensia ku enfermeronan i enfermeranan ta kapas ta tuma nan mes desishon.’
Segun e fundadó i direktor di Buurtzorg: ‘Si un profeshonal den kuido por konektá ku e pashènt e kalidat di kuido ta subi. Komo konsekuensia hende ta hopi mas satisfaktorio ku e kuido ku nan ta haña. Meskos ku e profeshonal di kuido, ta hopi kontentu.’

Kuido mas barata
Segun De Blok esaki ta e konsekuensia di e desishon pa traha ku ménos mènedjer posibel. ‘Si tin hopi mènedjer den un kompania e chèns ta grandi ku nan ta mishi òf intervení ku e trabou di e trahadó. Esaki no ta nos intenshon. E profeshonalnan di kuido mes sa bon bon kon nan por hasi nan trabou mas mihó posibel. I den esaki nan tin un relashon di konfiansa ku nan pashènt.’
Komo konsekuensia di esaki e kostonan pa kuido ta hopi mas abou ku organisashonnan ku tin hopi mènedjer i ofisinanan grandi.

Den 10 aña: for di 4 na 10.000 trahadó
Den aña 2006 De Blok a kuminsá ku Buurtzorg ku 1 tim di kuater persona, inkluí su mes. ‘Nos a haña hopi atenshon na Hulanda, pasobra nos tabatin un manera di traha ku tabata otro for di tur otro organisashon ku ta duna kuido na kas.’ Den un periodo di dies aña Buurtzorg a krese for di un organisashon ku kuater persona na un organisashon di 10.000 persona na Hulanda. Awor, den aña 2022 Buurtzorg tin mas ku 15.000 trahadó. Tambe e organisashon ta aktivo den mas ku 30 pais. CEO di Buurtzorg Internashonal ta Thijs de Blok, ku ta e yu mas grandi di Jos de Blok. Jos tin tres yu hòmber, dos ta aktivo den su kompania. Segun Thijs de Blok for chikitu el a siña for di su tata e konsepto di Buurtzorg. ‘E konsepto ta ku bo mag di ta kritiko, bo mag di puntra pakiko sierto kos ta asina. Pero bo tin ku hasi esaki ku rèspèt pa otro hende.’ Segun Thijs de Blok meta di Buurtzorg ta pa duna hende e mihó kuido ku ta posibel. ‘Nos por duna e mihó kuido posibel pasobra nos ta puntra e pashènt kiko e ke. I nos ta hasi tur kos ku ta posibel pa e pashènt.’

Hopi interes for di otro pais
Segun Thijs de Blok esaki ta un di e motibunan pa Buurtzorg ta aktivo den asina hopi pais. ‘For di diferente pais nos a wòrdu aserká dor di organisashonnan. Nan ta interesá pa traha ku nos. Na tambe ke mehorá e kuido na nan pashèntnan i hende grandi na kas.’ Un parti importante di e trabou di Thijs de Blok ta pa vigilá e partnernan den otro pais. ‘Pa nos ta sigur ku tambe den otro pais nos ta duna e kuido mas mihó posibel.’
Pa introdusí Buurtzorg na Kòrsou i Aruba, Visser Pharma Group a aserká Buurtzorg Nederland. Djaweps anochi Buurtzorg a duna un presentashon pa tur hende ku ta interesá. A invitá hende di sektor di kuido, di ministerio di salubridat i di kompanianan di seguro. Na e momento aki hende ku ta hasi uso di e servisio di Buurtzorg na Kòrsou i Aruba no ta haña kompensashon di gobièrnu ni di kompania di seguro. Na Hulanda pashènt si ta haña kompensashon.

Kuido personal!
Direktor di Buurtzorg Caribbean sra. Dalila Trinidad ta splika ku e kompania ta den deliberashon ku gobièrnu i kompanianan di seguro tokante kompensashon. E ta splika ku Buurtzorg ta aktivo for di awor. ‘Nos tin algun trahadó hopi adekuá. I nos ta kla pa kuminsá.’ Segun Dalila Trinidad tin hopi interes riba e islanan. ‘Tin hopi interes for di persona ku ke haña kuido personal na kas. Pero tambe famia ta informá kiko nos por hasi pa nan ser kerí.’ Dalila Trinidad ta splika ku pa hopi hende ta hopi importante pa keda biba na kas. ‘Pero awor hopi bia yunan tin ku kuida nan mayornan ora nan ta bira grandi. Pero esaki no ta ideal. Si un yu muhé tin ku duna kuido na su mayornan i na mesun tempu tin ku sòru pa su mes yunan i hopi bia tin ku traha tambe, e situashon por bira di mas. Pa e motibu nos ta ofresé kuido profeshonal i personal! Esaki ta bon pa e pashèntnan i hende grandi. Pero tambe pa e yu mes.’

Hopi interes pa Buurtzorg Caribbean
Segun Dalila Trinidad Buurtzorg Caribbean a haña hopi reakshon tambe for di hende ku na e momentu no mester tin kuido, pero ku ke ta prepará pa e momentu ku nan mester tin kuido pa nan mes òf nan mayornan.’ Banda di esei Buurtzorg Caribbean ta buska enfermero i enfermera profeshonal. ‘Nos ta traha ku hende profeshonal. Tambe Buurtzorg Caribbean por siña hende den e profeshon di kuido. Awor tin algun hende eksperensiá for di Hulanda ku ta yuda nos.’ Pero Buurtzorg Caribbean ta buska hende lokal. ‘Pa ofresé kuido profeshonal i personal na kas, ku atenshon pa nos kultura i kustumber.’

Pas mas informashon hende por manda un mail na info@buurtzorgcaribbean.com òf bishitá e wèpsait: www. buurtzorgcaribbean.com. Òf yama: +5999 696 2729.