WILLEMSTAD.- Curaçao Airport Partners 9CAP ta lansa dos inisiativa importante, ayera den su departamento di mantenementu na Airopuerto di Kòrsou. Ku presensia di minister di enseñansa Siensia Kultura i Deporte Sithree van Heydoorn, CAP a pone énfasis riba su kompromiso pa ku desaroyo di komunidat i empoderá nos hóbennan.

E promé inisiativa a marka entrega ofisial di 20 iPad pa muchanan di skol di fundeshi Elis Juliana Sheila Karel. Manera primintí durante di e desvelo di e plenchi di hunga dia 25 di ougùstùs último, e iPadnan ku nan “cover” i dos aña di lisensia pagá a keda poné den man di e studiantenan hóben pa en grandesé nan edukashon i kresementu. E kontribushon aki ta simbolisá CAP su dedikashon pa promové oportunidatnan no solamente den aviashon pero tambe den henter komunidat.

“E iPadnan ta mas ku un donashon; nan ta instrumentonan pa siña i eksplorá”, asina Jonny Andersen CEP di CAP a bisa na okashon di e entrega. “Nos ta kere den krea kamindanan pa e próksimo generashon i esaki ta un inisiativa ku ta siña e muchanan pa haña éksito den un mundu digital ku ta sigui desaroyá”.

Sam sam ku e evento aki a lansa tambe ofisialmente un programa di stazje nobo na airopuerto di Kòrsou ku studiantenan di Juan Pablo Duarte AGO.

E inisiativa aki ta diseñá pa duna e studiantenan eksperensia balioso den trabou, entrenamentu práktiko i oportunidat di mentor den e departamento di mantenementu di CAP. Pa medio di e programa aki e studiante lo gana abilidat práktiko miéntras nan ta haña guia di profeshonalnan ku eksperensia riba e tereno, yuda nan pa trese konfiansa i pone nan riba un kaminda pa éksito den futuro.

“Nos ta mira e stazjèr aki mas ku simplemente un introdukshon na un lugá di trabou. E ta trata di hasi su impakto real den bida di e studiantenan ku ta enfatisá desafio grandi”, Andersen a sigui bisa. “Na Cap nos ta kere den  traha riba e generashon próksimo, yudando esaki pa realisá nan potensial i duna nan e instrumentonan ku nan mester pa prosperá”.

Minister van Heydoorn tambe a hiba palabra, gradisiendo CAP pa e inisiativanan i nan impakto positivo riba komunidat. E mainta a terminá ku firmamentu ofisial pa asina simbolisá CAP su dedikashon kontinuo pa traha riba e generashon próksimo komo lidernan i empoderando e hóbennan di Kòrsou pa yega haltu.