WILLEMSTAD.- Por bisa ku e tráfiko aéreo internashonal di Kòrsou a eksperensiá un periodo ku su retonan den e di dos mitar di 2021. I den esaki por bisa tambe ku, un bista den e desaroyonan di Curacao Airport Partners (CAP) ta reflehá kontinuashon di un optimismo kouteloso. E demanda lo por ta oumentando pero e vírus i su variantenan agresivo ta keda den kontròl.

E brote devastador dje variante Britániko riba nos isla den prinsipio dje kuartal a trese kuné un oumento den e restrikshonnan i kondishonnan pa por drenta. Pero simultaniamente gobièrnu a lansa un kampaña agresivo di vakunashon. E esfuersonan a proba ku ta eksitoso i esei a reflehá den e datonan. Tráfiko den luna di yüni a mustra un subida den e kantidat di pasahero for di e rutanan manera Amsterdam, Miami, Bogotá, Panama i Karibe Hulandes.

Tráfiko di salida internashonal durante e di dos kuartal di 2021 a ser enkabesá dor di Hulanda ku 50% dje merkado; USA 21%; Karibe Hulandes 20% i Sur-Amerika 4%. Buelonan for di Bogotá i Panama a start atrobe ku servisio non stòp den di dos kuartal, aunke ku ménos frekuensia ku promé ku e pandemia.

Mas aleu CAP ta bisa den su relato ku e asientonan okupá pa buelo mensual tabata 51% na aprel; 45% na mei i 78% na yüni, ku un okupashon di asiento pa buelo di 60% den e di dos kuartal.

Sifranan mensual pa e di dos kuartal di 2021 a reflehá e brote dje vírus den aprel i mei, miéntras ku a alkansá un rekuperashon positivo na yüni. E sifranan mensual pa luna di aprel a mustra a bahada di -27% kompará ku mart 2021; mei a mustra un rekuperashon leve ku un subida di +6% kompará ku aprel i a finalisá e kuartal ku un yüni fuerte ku a krese ku +132% kompará ku e luna promé (mei). Yüni a konosé e subida mensual di mas grandi for di yüli 2020, ku 62.592 moveshon di pasahero. Si kompará e promé i di dos kuartal di 2021 por bisa ku e kantidat total di pasahero a krese ku +32%.

Rekuperashon di tráfiko durante e di dos kuartal di 2021 kompará ku di dos kuartal di 2019 a reflehá un kresementu di +24% den aprel; +29% na mei; i +53% na yüni 2021.

Kompará ku añanan anterior, e promé semèster di 2021 a resultá den un bahada di -43% kompará ku e mesun periodo di seis (6) luna na 2020 i un bahada di -72% kompará ku e promé semèster di 2019.

Di akuerdo ku e Konseho Internashonal di Airopuerto (ACI), tráfiko di pasahero global den 2020 i 2021 ta indiká un pèrdida di dos aña di 10 miar pasahero kompará ku e pronóstiko promé ku COVID-19. Pa 2021 esei ta tradusí den un pèrdida di 5 miar pasahero, ku ta un bahada di -51% kompará ku 2019. E impakto finansiero riba airopuertonan mundialmente ta ser kalkulá na un pèrdida di $108 miar na entrada. ACI mas aleu ta antisipá ku pa final di 2021, basá riba e aktual senario, e rekuperashon total di tráfiko di pasahero lo ta entre 45% i 55% kompará ku 2019. Distribushon di vakunanan efektivo pa merkadonan grandi, kitamentu gradual di restrikshonnan internashonal, rekuperashon dje konfiansa di pasaheronan i un rekuperashon rápido dje flota di kompanianan lo por indiká un rekuperashon kompleto dje tráfiko global pa final di 2023. Un perspektiva mas pesimista lo por pusha e rekuperashon bèk na 2024.

Di su parti CAP ta pronostikando un di dos semèster mas fuerte den 2021 i ta keda koutelosamente optimista, miéntras ku e pandemia, demanda di tráfiko, buelonan, merkadeo i promoshon ta sigui hunga un ròl importante den establesé un fluho di pasahero mas pronostikabel i konsistente.

“Nos ta keda optimista, pero alerta, teniendo kuenta ku e brote resien na Hulanda, i ta antisipá un bon zomer e aña aki”, esei di akuerdo ku Paulo Mazzali, CEO di CAP, a deklará. “Te ainda nos ta sinti falta di e tráfiko mas pisá for di Nort i Sur-Amerika, kual lo mester bini bèk fuertemente bèk durante e di dos semèster, i nos lo por alkansá e nivelnan di tráfiko di 2020, algu ku tabata parse virtualmente imposibel si mira e promé 5 lunanan di aña. E tendensianan aktual ta mustra riba un 2022 mas mihó, no opstante leu for di e añanan pre-COVID.

E esfuersonan di vakunashon hasí dor di Kòrsou, hasiendo e isla un destinashon ‘safe’, ta tresiendo un perspektiva positivo, no solamente pa nos proyekshonnan den tráfiko, pero pa henter e industria di turismo. Esaki tambe ta stimulá e ekonomia dje isla i ta krea e kuponan di trabou adishonal nesesario.”