WILLEMSTAD.- Merkado di kas na Kòrsou ta bou di preshon. Tin hopi pedido pa kasnan pagabel, pero e oferta riba merkado no tei. Preis di propiedat inmóbil a subi drástikamente.

Eks direktor i aktual miembro di hunta di komisario di Maduro & Curiel’s Bank, Chicú Capriles ta bisa ku na banko tambe a tuma nota di e fenómeno di preisnan di kas ku ta subi. E ta kalifiká esaki komo un problema di luho. “Ekonomia ta bai bon, pero e hende lokal, spesialmente hóbennan, tin difikultat pa yega na un propiedat di nan mes”, Capriles a indiká den e podcast ‘3’or ku Gino’ riba plataforma digital di EXTRA.

Na su opinion esaki ta algu ku gobièrnu huntu ku Fundashon Kas Popular (FKP) mester wak kon por resolvé,  trahando mas kas pa diferente segmento den komunidat. Esaki mester yuda tene e gastunan di kas den sierto márgennan di preis. “E merkado privá di kas ta bou di preshon, pues mester di un alternativa pa e grupo ku ta kai chikí.”

E mesun argumento akí ta konta tambe dikon hopi profeshonal hóben ku a bai studia den eksterior no ke regresá Kòrsou, Capriles ta sigui bisa. “Nan no ke bai biba atrobe den kas di nan mayornan i ke nan propio kas, pero merkado no ta ofresé nan algu pagabel. Capriles ta di akuerdo ku e problema di oumento di preis di kas i tereno ta bini ku e kresementu di sektor turístiko.

Hopi proyekto di konstrukshon ku ta tuma lugá ta den kuadro di turismo. Ta traha hotèl pero tambe komplehonan di apartamentu pa hür pa periodonan kòrtiku ku turista. Banda di esaki e turista ku a gusta Kòrsou i ke regresá ku regularidat tambe ta interesá den kumpra un propiedat.

E turista akí tin un poder di kompra mas grandi ku e yu di Kòrsou i ta ofresé mas pa propiedatnan lokal. Konsekuentemente e pedido ta surpasá e demanda den kantidat i preis, loke ta okashoná ku e merkado di kas i tereno, spesialmente e merkado privá, ta bira impagabel pa e yu di tera.

Te asina leu haña fiansa na banko lokal, e suma ku ta haña fia no ta yega pa kumpra un kas kuné òf ta yega nèt pa kumpra un tereno, pero no ta sobra espasio finansiero pa traha un kas riba e tereno akí. Capriles ta rekonosé e problema akí i ta bisa ku na banko tambe e problemátika akí ta bisto.

Banko ta mira hopi pedido pa finansiamentu pa konstruí proyektonan den sektor turístiko i tambe kas, pero e último akí prinsipalmente den e segmentonan di preis mas haltu.