WILLEMSTAD.- Bo no mester tin un estudio haltu pa realisá ku sektor di turismo so komo pilá ekonómiko ta un riesgo. Pa e motibu akí mester sigui traha riba mas pilá ekonómiko. Asina miembro di hunta di komisario di Maduro & Curiel’s Bank a trese dilanti den e podcast ‘3’or ku Gino’ riba plataforma digital di EXTRA. Resien Capriles a baha komo direktor di e banko, pero ta keda envolví komo miembro di hunta di komisario.

Sektor energétiko i ketu bai posibilidatnan pa hasi Kòrsou un hup ekonómiko pa region segun Capriles ta potensialnan ku mester eksplorá pa asina krea un base ekonómiko sólido i mas amplio na Kòrsou. Den esaki e ta pensa mas riba posibilidatnan pa hasi di Kòrsou un hup digital pa servisionan ku un kompania manera Blue Nap Americas ta ofresé. Alabes e ta pensa ku haf marítimo i aeropuerto tambe, ku drechamentu di barku i avion, ta un potensial ku por saka mas aktividat for di dje.

“No ta bon pa tin un ekonomia ku ta drei riba un pilá so, pasobra e ta keda un riesgo.” Capriles ta splika ku rònt mundu ta asina ku ora kos no ta bai bon, hendenan ta kòrta semper den luho promé i biahamentu ta un luho. P’esei mester traha riba diversifikashon ekonómiko.

Den esaki Capriles ta mustra ku e sistema hudisial i seguridat na Kòrsou ta traha na nos bentaha. Esakinan ta importante pa e kalidat di bida na Kòrsou i tambe ta duna invershonistanan e siguransa ku nan derechonan ta salbaguardiá ora disidí di invertí na Kòrsou. E ta konvensí tambe ku awor ku a nombra aktual presidente di Korte Komun, Mauritsz de Kort, komo e siguiente gobernadó di Kòrsou, ku sa di nombra un bon remplasante.

Diversifikashon ekonómiko ta algu ku tin hopi tempu ta papia riba dje na Kòrsou. Kòrsou pa hopi aña a drei riba 2 pilá ekonómiko, ku ta refineria i servisio finansiero internashonal. E servisio finansiero internashonal, segun Capriles ta bisa, práktikamente no ta eksistí mas, miéntras ku e refineria di Kòrsou tambe tin algun aña kaba ku e no ta den funshon.

Ta den e kuadro akí Kòrsou, meskos ku vários otro pais den region di Karibe, ta pusha pa un sektor turístiko mas grandi i stabil posibel. Turismo ta e pilá ekonómiko mas importante di Kòrsou entretantu manera Banko Sentral di Kòrsou i St. Maarten (CBCS) ta konfirmá. Sugerensia di CBCS na gobièrnu di Kòrsou tambe ta pa krea diversifikashon ekonómiko.

Un punto di preokupashon ta e défisit struktural riba balansa di pago di Kòrsou. Aunke ku segun CBCS ta trese dilanti ku e reserva di divisa di Kòrsou i e kobertura di importashon ta saludabel.