WILLEMSTAD.- Un biaha mas EXTRA tin di para ketu na e sitio na playa di Caracasbaai i bisindario. Un área turístiko, un área ku ta keda promové den mayoria video ku ta mustra e beyesa di Kòrsou, pero esaki ta realidat?

E aña aki ta diferente bia nos a mustra riba e situashon na e playa di Caracasbaai i bisindario. E luna aki mes nos a mustra riba kantidat di kachó peligroso i molestoso ku a kue e bankinan hasi di nan.

Dos luna pasá nos a mustra riba e dekadensia di e península di Caracasbaai.

Lamentablemente un área ku mester ta un parke históriko unda nos mes hendenan por bai keiru i rekreá i turistanan por atmirá. Un área ku lo mester ta un balor agregá pa nos turismo, a para bira pa basta tempu kaba un nèshi pa kriminalnan i un landfill pa otronan.

Un sitio unda den pasado un kompania krusero mundialmente konosí kier a desaroyá. Ora un kompania asina kier desaroyá un área ta pasó nan ta mira e bunitesa den esaki.

Awor el a bira un kaminda ku ta bin topa kadaver, droga, outonan hòrtá bandoná i kada bes esnan ku bai landa na un di e playanan mester tin miedu di keda atraká òf ta bin haña nan ku e sorpresa desagradabel ku a kibra bentana di nan outo pa hòrta.

Otronan ta bin benta nan shushi einan, manera ta un landfill di Selikor. EXTRA na kantidat di okashon a publiká di krímennan kometé den e área aki.

Apesar di tur e publikashonnan di loke ta sosodé na e área ei, no ta hasi apsolutamente nada pa garantisá seguridat pa nos hendenan lokal mes ku ta bai kana òf landa einan i tambe turistanan ku ke konosé un parti asina importante di nos historia.

I awe nos ta mustra riba e dekadensia di e palapanan. Praktikamente no tin ni un na drechi mas. Sea nan ta lèn di un banda, òf bishitantenan mes a kue piedra wanta nan kuné, pa tòg por usa nan.

Playa di Caracasbaai ta un laman masha bunita i dushi, no solamente pa esnan ku ke landa pero tambe e ta sumamente bunita pa esnan ku ke disfrutá di e bista. Ta un playa unda tantu hende lokal komo ekstranhero ta disfrutá engrande, pero awor e ta den dekadensia total i parse ku tur ora i wowo di esnan responsabel pa e playa ta será.

EXTRA a komprondé ku playanan ta responsabilidat di LVV.

Nos a buska kontakto ku Ofisina di Turismo pa wak si akaso CTB ta mantené playanan públiko ainda. Bosero di CTB a splika ku e playanan no ta bou di maneho di CTB i awor aki CTB no tin niun plan pa kontrolá, mantené i manehá playanan públiko.

E situashon di playa di Caracasbaai i rondó di dje bai kue te e península di Caracasbaai ta rekerí atenshon urgente. Pero nos no por sera wowo ku usuarionan di e playa tambe tin di kuida loke gobièrnu ta pone na nan disposishon pa evitá e tipo di dekadensia aki.