WILLEMSTAD.- Organisashon Care4U ta traha duru pa duna hòbennan na Kòrsou trabou. Segun nan ‘tin trabou pa hòben ku ke traha’. Den koperashon ku Smart Outsourcing Care4U Megadream a instalá un plataforma virtual. Care4U tambe a organisá diferente dianan di inskripshon. Segun inisiadó di Care4U, Tayni Preciosa, tin hopi interes na hòbennan pa e plataforma. Tin trabou entre otro den e areanan di limpiesa (kas, kantor, skol, evento), kuido di hende grandi, kuida pa mucha i trabou manera guia turistikó. Care4U ta situa na Corriweg 78. Tayni Preciosa ta splika ku su organisashon no ta inskribi hòben ku ta buska trabou so, pero tambe ta duna guia di motivashon na hòbennan i traha riba desaroyo di nan. Tambe Care4U ta duna e hòbennan yudansa ku nan presentashon virtual. Ta intenshon ku kompanianan por subi e plataforma di Care4U pa mira e personanan ta buskando trabou. Preciosa: ‘Den e kuadro ta importante ku e hòbennan ta duna un bon presentashon di nan mes riba e plataforma’.
E plataforma ta diseñá i mantené dor di kompania Smart Outsourcing. Den un entrevista ku EXTRA direktor Born ta splika ku ta importante ku hòbennan ta haña guia kon nan ta presentá nan mes mas miho posibel. Pa doñonan di trabou ta importante ku nan tin un mentalidat habri, segun Born. ‘Hopi bia ta difisil pa un hòben por duna un presentashon di su mes persona. Pero komo doño di trabou ta importante ku bo tin un aktitut habri i honesto i ta ofrese hoben un oportunidat; hopi bia esaki tin konsekuensia hopi positivo.’
Tayni Preciosa ta splika EXTRA ku ta hopi importante ku hòbennan i doñonan di trabou ta sera konosí ku otro na un manera virtual. ‘Un trabou ta algu hopi importante pa hopi hòben. Por ta, situashon na kas no ta optimal, por ta nan tin ku yuda otro miembro di famia, òf nan tin yu. Via e plataforma nos ke krea un ambiente habri pa e dos partido por mira kiko ta e demanda i e pregunta riba merkado laboral.’ Born: ‘Komo doño di trabou mi ta splika por ehempel na stazjer nobo ku nan tin ku hasi fayo. Pasobra si bo no ta hasi niun fayo esaki ta nifiká ku bo no ta purba nada i ku bo no ta kambia tampoko. Na promé instansia pa nan e ta algu straño, pero despues nan ta kompronde mi punto di bista. Esaki ta un di e puntonan ku mi ta mira den Care 4U tambe: duna hòben konfiansa, yuda nan ku un bon presentashon i soru ku nan por desaroya nan mes.’