WILLEMSTAD.- E di dos universidat mas grandi di Kòrsou ta Caribbean Medical University (CMU) ku ta situá den World Trade Center. E universidat ta konta ku un gran kantidat di studiante for di rònt mundu pa nan formashon médiko. E universidat ta kotisá pasobra e ta duna un formashon sin loke ta konsiderá "balast", esei ta loke Ivan Moreno ku ta bosero di e instituto a bisa e siman aki.

Moreno a duna un splikashon di e trabounan na e universidat den kuadro di e aktividat grandi ku ta bai tin mañan na Bándabou pa kontròlnan médiko pa interesadonan. E mes ta dunando lès na e skol. E universidat tin un reputashon pa salvaguardá i kier ta parti di komunidat tambe. "Nos ta duna bèk na komunidat a base di e tèstnan ku ta ofresé. Ya kaba a hasi esei na otro partinan i den futuro tin pensá di ekspandé a presentashonnan aki".

Ta konosí ku universidatnan den eksterior, prinsipalmente médiko ta pasando un ‘screening’ pisá di outoridatnan i por sierto medionan di komunikashon tambe. Den Caribe tin mas ku 50 di e skolnan médiko aki. Na Kòrsou mes tin kuater ku ta establesé awor aki entre otro Avalon i St. Martinus. Pero esun di mas kategoria sin duda ta Caribbean Medical University ku no tin e problema ku e kontròlnan aki. "E loke ta duna na formashon ta di kalidat altísimo. Ademas e ta hopi mas barata ku na Merka mes. Mayornan ta preferá pa skohe pa nan yunan studia na un tipo di universidat asina aki. Ora bo kaba si bo tin ku pasa e tèstnan nesesario na Merka promé ku bo por yama bo mes un médiko", asina el a  splika. Por sierto ku e rekisito ei no ta algu di Merka so pero ta tur lugá di mundu tin e mesun normanan aki. Na Merka nan ta wak kiko e studiante a bin kuné i por lo general e studiantenan ta bai ku un bon formashon i referensia. "Nan ta wak e kalidat di e studiante den e tèstnan na Merka. Nos mes tabata un studiante di Nigeria ku a haña referensianan tòp. Por sierto tin basta studiante di Nigeria na nos instituto. E studiantenan ta bin for di Merka, Canada, India, Egipto, Afganistan i Afrika. Moreno a bisa ku su instituto no ta hasi kaso di e publikashonnan ku tin pa loke ta trata e universidatnan ku no ta funshoná. Por sierto tin algun di nan a sera tambe, entre otro na Boneiru. "Nos ta sigui hasi nos trabou. Nos énfasis ta pa e studiantenan haña un bon formashon na nos instituto", asina el a bisa. E studiantenan di CMU ta keda parsialmente na Hotel Clarion i tin un parti ta keda den Otrobanda.

E aktividat di CMU ta mañan djasabra. E studiantenan di Caribbean Medical University (CMU) ta organisá na Barber, espesialmente pa públiko di Banda Abou, un “Mobile Health Clinic” na Hòfi Popo Rojer, Esaki lo tuma lugá di 10'or d mainta pa 3'or di atardi. Tur hende por laga chèk nan preshon di sanger i tambe kontrolá nan nivel di suku (diabétis screening). E resultado nan ta wòrdu spliká mesora na e partisipante i ta duna informashon ekstenso di diabétis i malesa nan di kurason, ku frekuentemente ta wòrdu kousa dor di entre otro preshon haltu. Den sierto kaso, ta rekomendá un partisipante pa konsultá ku nan dòkter di kas pa un checkup mas ekstenso. E propósito di e klínikanan aki ta pa halsa e nivel i e importansia di e tres kousanan mas importante di malesa na Kòrsou, ku ta preshon haltu, diabétis i sobrepeso (obesitas). Ademas e ta un manera pa e studiante haña un oportunidat pa praktiká algun prosedura médiko simpel, asina Moreno a splika.