WILLEMSTAD – Apesar ku aktualmente ta temporada abou pa turismo krusero tòg algun barku ta bishita Kòrsou. Awe ta di bishita e barku krusero Carnival Celebration. For di mainta tempran alrededor di 7or e barku a mara na Megapier i lo sali mas atardi pa 4:30 pm. E barku aki tin un kapasidat di 6500 pasahero i tin un tripulashon di 1735. Pues por bisa ku awe lo tin basta turista den nos sentro di siudat i nos playanan. Operadornan di tour i taxi ta haña un empuha positivo pa e temporada mas ketu aki. E barku a sali for di Miami i ta riba un trep di 8 dia i ta bishita Aruba i Boneiru tambe. E barku tin un largura di 344 meter i a keda konstruí na 2021 na un balor di 1 bion dòler. Sigur un empuhe ekonómiko awe pa Kòrsou. E temporada haltu pa turismo krusero ta inisiá na òktober próksimo pero pa november ta kuminsá risibí hopi mas barku.