Casha: Korsou kuidou pa no bira víktima di bo éksito!

WILLEMSTAD.-Den un informe e asosiashon di hotèl chikitu i apartamentu Casha ta ekspresa nan preokupashon pa desaroyonan den turismo na Kòrsou. Casha ta mustra ku tur luna nan ta lesa i mira relatonan positivo ku turismo ta kresiendo na Kòrsou, anto tur luna ta kibra record nobo. Esei sigur ta algu bon i positivo, pero ta bon pa keda alerta pa Kòrsou no bira víktima di su propio éksito.

For di Oropa nan a tuma nota ku e kantidat di turistanan a baha debí na e preisnan astronómiko haltu, pero esei den sierto sentido ta konsekuensia tambe di e gran kantidat di paketenan di fakansi. Pero a bini e bon notisia ku Corendon ta bai bula ku su propio avion for di Hulanda. Esei mester resultá den mas kapasidat riba e ruta i e espektativa ku e preisnan lo baha. Pa loke ta trata e merkado merikano por tuma nota ku tin mas kompania di aviashon ta konektá Kòrsou ku Merka i esei ta bon pa e diversidat i kompetensia ku ta nesesario.

Casha a tuma nota ku Corendon ta kumpra The Ritz, e kompleho di hotèl i apartamento den Skarlo. Di e forma ei Corendon ta ekspandé nan posishon den merkado na Kòrsou. Casha ta enfatisá ku aktualmente 20% di kambernan di hotèl na Kòrsou ya kaba ta den man di e grupo Corendon.

E asosiashon tin miedu ku grupo Corendon lo bai dominá i determiná kiko ta pasa den merkado anto esei no ta bon pa turismo, e no ta bon pa empresarionan den turismo i e no t a bon pa niun hende. Ademas Casha ta teme ku Corendon lo bai haña poder riba gobièrnu.

Casha ta insistí ku Kòrsou mester paga bon tinu i evitá ku su industria di turismo ta kai den man di un man yen di hende ku lo tin kontrol i lo determiná ki salario ta paga, ki preis ta kobra i tur otro asuntu.