WILLEMSTAD.- E asosashon ku ta representá apartamentu i hotèlnan chikí aki na Kòrsou, CASHA, ta duna di konosé ku nan ta hopi preokupá ku último desaroyonan. CASHA a presentá sifranan di okupashon di nan miembronan. Segun CASHA okupashon di luna di desèmber 2020 ta 24 porshento. Ku ta 4.2 porshento mas abou ku e sifranan di novèmber 2021. Den total 33 akomodashon a duna CASHA e sifranan di e último luna. No mas ku 4 akomodashon tabatin un okupashon di mas ku 50 porshento. Den total 5 akomodashon no a haña niun wéspet. E otro 24 akomodashon tabatin un okupashon entre 2 i 47 porshento. Normalmente luna di desèmber ta un luna hopi bon pa e akomodashonnan, ku un kantidat di okupashon di 75 te 85 porshento.
CASHA un luna pasá a presentá sifranan di okupashon pa luna di novèmber 2020. E sifranan a indiká un kresementu leve den okupashon di 20% pa 29,2% den e sektor di CASHA. Entre 26 di nan miembronan, tin 7 akomodashon ku a registrá pa luna di novèmber riba 50%. Tambe 11 akomodashonnan a registrá un okupashon entre 11% pa 48%. Algun akomodashonnan a ofresé StayCation, pues okupashon pa ménos entrada. Tabatin 95 reservashon menshoná pa desèmber i adishonalmente mas reservashon pa 2021. Tabatin 8 akomodashon no tabatin okupashon den luna di novèmber.
Awor CASHA ta bisa ku e akomodashonnan ku a ofresé ‘local deals’ a haña hopi ménos entrada ku normal. Segun CASHA tin wéspet ku a pidi pa un deskuento di 50 porshento i mas. Banda di esei e preis ku ta normal den euro, awor ta wòrdu paga den Naf.
Segun CASHA hopi doñonan di akomodashon turístiko a duna di konosé na e asosashon ku nan no tin niun reserva mas i nan no por sigui hopi tempu mas. E kantidat di kanselashon ta dramátiko. Hopi akomodashon ta duna di konosé ku nan a pèrdè tur reservashon pa luna di yanüari. Motibu prinsipal pa e kanselashon ta ku Hulanda a kategorisá kódigo oraño pa Kòrsou.
Segun CASHA kantidat di reservashon pa yanüari ta hopi abou. Akomodashonnan no tin niun speransa ku situashon ta drecha riba término kòrtiku.