WILLEMSTAD.- E sifra di okupashon serka apartamentu i hotèlnan chikí lamentablemente e luna aki no ta mustra nada bon. A kuminsá aña ku un bahada den e sifranan di okupashon. Okupashon na yanüari 2021 ta asta mas abou ku 20% esta 19.9 pa ta presis.

Casha ta bisa ku na yanüari 2021 mester a lidia ku hopi kanselashon, inklusive asta 100% pa algun di e alohamentunan. Komo motibu e alohamentunan ta mustra riba prinsipalmente e sensashon di bèrgwensa di biaha di e bishitantenan di Ulanda. Tambe e ta bin na e inklaridat riba e reglanan ku ta hasi ku e hendenan ta disidí na no bai i ta warda mihó tempu.

Ademas algun alohamentu a bisa ku nan ta ofresé deskuentonan na lokalnan i despues e preisnan pa anochi ta strukturalmente mas abou ku na 2020 pa asina pro generá algu di entrada.

No tin reservashonnan nobo i e propietarionan di alohamentunan ta ansioso pa mira si e reservashonnan eksistente tambe ta keda kanselá.

Resumiendo por bisa ku no ta un bon notisia i no ta primintí di mehorá den e próksimo lunanan.

E pèrdidanan grandi di benta di te asta 100% ta reflehá tambe den e empresanan afiliá na Casha ku ta hür outo, skolnan di buseo, guianan di turista i atrakshonnan. A pasa 11 luna ku e pesadia a kuminsá pa tur ku ta traha den e sektor di turismo.

Parse ku gobièrnu ainda ta pensa den e yudansa finansiero primintí, pasobra desafortunadamente hopi empresa chikí ta kai for di e areglo. NOW ta mas bien pa trahadónan i no pa empresanan.

Loke ta duna na esnan ku ta traha riba nan mes no ta sufisiente pa kubri gastunan fiho di nan ni di e empresanan chikí.

Apesar di e promesa di gobièrnu e empresanan mikro i chikí no tin derechi na niun tipo di apoyo te e dia di awe. E úniko kos ku nan ta haña di MEO ta un e-mail pa nan no lubidá paga nan impuestonan na tempu.

Tur e empresarionan aki tin 11 luna luchando pa tene kabes riba awa. Nan ta yena un buraku ku oro. Algun ya a hoga i otronan pronto lo sigui.

A pone minister Martina i MEO na altura di e situashon pero no a haña ainda niun kontesta.