Plachi di dia motibu prinsipal pa kanselashon

WILLEMSTAD.- CASHA e asosiashon di empresarionan chikitu den sektor di turismo a laga hasi un investigashon den su seno pa haña un bista kon e sektor a desaroyá den lunanan tras di lomba. Tin akomodashon ku a logra apénas 10.5% di okupashon den aprel, miéntras ku na mart sikiera nan a yega 25.1%. 31 akomodashon a partisipá na e investigashon di CASHA di kua 14 a indiká ku nan no a hana ni un turista den aprel. Apénas 2 akomodashon a logra riba 40% di okupashon. Esun ku a skor mihó(45%) ta un doño ku a hür su apartamentunan ku klientenan ku e konosé kaba.

11 akomodashon a logra un okupashon di 25%, di 1% te ku 23%. Den mayoria kaso ta trata aki di wéspetnan ku a bai pasa dianan di resurekshon, pagando tarifa lokal. E sobrá 4 akomodashonnan ku a registrá porsentahe haltu di entre 26.5 – 39% ta akomodashonnan na kosta, di manera ku nan wéspetnan por hasi uso di laman.

Pa miembronan di CASHA ‘plachi di dia’ tabata e motibu prinsipal di mayoria kanselashon. Tambe e echo ku no por a bai landa na playanan. E echo ku no tabatin hopi restorant for di kua por a hasi pedido di kuminda tambe un motibu pa kanselashon. Esei a pone ku wéspetnan tabata preferá un akomodashon ku tin fasilidatnan di restorant presente. E ‘toque de queda’ no tabata un motibu partikular pa iritashon.

Un di e motibunan ku a kousa hopi disgustu serka bishitantenan ta e hasimentu di test. Mayoria empresario ta no tin niun reserva mas i nan tin problema pa sigui kubri gastunan fiho manera hür, hipotek i Aqualectra. Nan tin duda si nan lo hana pago den kuadro di e areglonan NOW i TBZO. Mas detaye den edishon di EXTRA.