Knops: SXM mester para emishon bono sino paga fiansa 50 mion mayan

WILLEMSTAD.-Den un informe ofisial awe mainta Banko Sentral di Kòrsou i Sint Maarten ta anunsiá kanselashon di e bono ku e instituto a emití na fabor di Sint Maarten. Ku e bono aki gobièrnu di Sint Maarten a spera di generá 75 mion florin, sinembargo a kanselá e bono. Banko Sentral ta splika ku minister di finansa di Sint Maarten ta kanselá e bono pa asina duna espasio na e isla pa sigui den negosiashon ku Ulanda riba un proposishon ku ta trata otro debe di gobièrnu di Sint Maarten ku ta vense 21 di oktober próksimo.

Un karta den poder di EXTRA ta mustra ku minister di finansa di Sint Maarten sr. Irion ta duna di konosé ku el a pidi pa posponé e emishon di bono pasobra e isla ta deliberando ku Ulanda riba refinansiamentu di un debe. Sint Maarten a opta pa aseptá e proposishon di Ulanda manera ta indiká den e karta di 16 di oktober último. Den e próksimo kuater simannan Sint Maarten lo sigui negoshá ku Ulanda pa kompletu e proseso di manera ku e isla por bini na remarke pa haña e di dos tranche di sosten pa presupuesto pa despues sigui ku deliberashonnan pa e di tres tranche di sosten pa presupuesto.

Tur esaki a bira urgente i nesesario despues ku sekretario di estado Raymond Knops a manda un karta fuerte pa minister Ardwell Irion den kua ta kòrda irion ku dia 21 di oktober, esta mayan djárason, un fiansa di 50 mion florin ku Ulanda a duna na Sint Maarten ta vense. Knops ta indiká ku pa 10 aña Sint Maarten ta na altura ku mester paga e fiansa aki bèk, naturalmente a tene kuenta ku e problemanan kousá pa orkannan. Sinembargo esei no ta kita e obligashon di Sint Maarten pa kumpli ku pago di su debe. Dia 17 di sèptèmber último minister Irion a pidi pa refinansiá e debe, riba kua CFT a bisa ku ta Konseho di Minister di Reino lo tuma un desishon riba esaki.

Knops ta proponé pa duna Sint Maarten kuater siman riba kumplimentu ku pago di e 50 mion florin ku ta vense 21 di oktober. Den e periodo ei e gobièrnu di e isla por kaba di deliberá ku Ulanda i CFT riba finansiamentu riba término largu. Pero pa esei Knops ta indiká ku Sint Maarten mester stòp e emishon di bono manera anunsiá pa Banko Sentral 14 di oktober último.