Ophetivo NPC e.o desaroyo di maneho i inklushon finansiero

WILLEMSTAD.- Centrale Bank van Curaçao en Sint Maarten (CBCS) a duna bonbiní na vários partido interesá durante e promé reunion di National Payment Council (NPC). Na Sint Maarten, e reunion a tuma lugá dia 22 di yanüari 2024 i na Kòrsou dia 25 di yanüari 2024. E grupo a duna atenshon na diferente tema riba tereno di pago, entre otro, e sistema Instant Payments, introdukshon di tarheta di débito Master i Visa, introdukshon di florin karibense i vários otro tema relevante. A señalá e puntonan di atenshon akí komo punto di agènda pa e reunionnan benidero.

NPC ta un plataforma riba kual e outoridatnan kompetente, CBCS i Bureau Telecommunicatie en Post (BT&P), huntu ku otro partido interesá por dialogá riba maneho di sistema di pago, ku un representashon balansá di interes públiko i privá ku tin di aber ku aktividat di sistema di pago. Tambe, e ta sirbi komo e lugá kaminda e suministradónan di servisio di pago (PSP) i usuarionan por ekspresá nan mes i interkambiá riba nan deseo- i retonan, i kisas transformá esakinan den funshonalidat nobo pa nos sistema di pago. Pues, e ophetivonan prinsipal di NPC ta: Desaroyo di Maneho, Siguridat i Efisiensia, Inklushon Finansiero, Interoperabilidat, Kolaborashon entre e Partidonan Interesá, i Informashon i Konsientisashon.

Tur aña, NPC lo skohe pa enfoká riba unu òf mas di e ophetivonan akí, segun e nesesidatnan di komunidat. CBCS ta presidí NPC, apoyá pa un sekretariado di CBCS. E reunionnan di NPC lo tuma lugá por lo ménos dos biaha pa aña. Fuera di e outoridatnan kompetente, NPC su membresia ta limitá na un grupo chikitu di e institutonan ku ta ser konsiderá mas relevante pa e kuestionnan spesífiko ku ta keda tratá. Entre nan, tin representante di e suministradónan di servisio di pago, manera e asosiashonnan di bankero di Kòrsou i Sint Maarten i Curaçao Fintech Association, i e institutonan ku ta representá e usuarionan di servisio di pago di e dos Paisnan, manera entidat di gobièrnu, kompania di utilidat, konsumidó, i asosiashon di negoshi.