Awe mainta tin reunion ekstraordinario di ACU!

WILLEMSTAD.- Banko Sentral di Korsou i Sint Maarten (CBCS) ta indiká ku nan a tuma nota di e atenshon ku ACU ta risibiendo den e medionan di komunikashon relashoná ku renunsia di Hunta di Supervishon di ACU. Manera ta konosí, CBCS ta monitorea e desaroyonan na ACU i a apuntá algun curator ku e meta di modernisá i mehorá e prosesonan operashonal i di governance. Esei debí entre otro na algun konflikto interno na ACU ku a trese intrankilidat. Ku e apoyo i empeño di e curatornan, a logra algun adelanto importante. A mehorá i profeshonalisá diferente proseso operashonal. Riba tereno di governance tambe, den e Reunion General di Sosio ku a tuma lugá dia 7 di mart 2021, ACU a fiha un kuadro nobo i transparente pa su struktura interno. E kuadro nobo akí ta konta ku apoyo di CBCS. E desishon di e Hunta di Supervishon di ACU di renunsia no mester ta un opstákulo pa ACU por sigui padilanti riba e ruta ku el a skohe i bira un organisashon kapas pa enfrentá futuro sin problema. Ku sosten di e curatornan, ta sigui elaborá e struktura nobo di governance, den armonia ku lei i regulashon, e prinsipionan di bon governance korporativo i pensamentu kooperativista.

EXTRA mester indiká ku awe mainta tin un reunion ekstraordinario di ACU pa su sosionan pa trata hustamente loke Banko Sentral ta trese dilanti. Ta den man di sosionan pa durante di e reunion aki tuma desishon i disidí si ta pidi pa e hunta di supervishon keda of kualke otro proposishon ku por surgi. E reunion a kuminsá 10’or di mainta na Universidat di Korsou (UoC).