Na okashon di Cg su komienso komo e úniko medio di pago legal

WILLEMSTAD/P’Burg- Dia 1e di yüli 2025, Centrale Bank van Curaçao en Sint Maarten (CBCS) lo pone un moneda spesial den sirkulashon. Ta trata akí di un moneda di sirkulashon na koló, na balor di Cg 0,50.

A produsí e moneda konmemorativo akí pa marka fin di e periodo di ‘kosirkulashon’ di Cg i NAf, i adopshon di florin karibense, entrante e mesun fecha, komo e úniko medio di pago legal na Kòrsou i Sint Maarten. Meskos ku e moneda di Cg 0,50 regular, e moneda konmemorativo na koló ta disponibel den dos vershon: unu ku ‘Curaçao’ i unu ku ‘Sint Maarten’ riba e banda dilanti. Tur dos vershon lo sirkulá den ámbos pais.

E úniko diferensia entre e moneda konmemorativo akí i e moneda regular di Cg 0,50 ta e koló. Riba e banda dilanti, por mira un flor di ‘asahar’ na koló. Hopi kultura ta asosiá ‘asahar’ ku prosperidat i ademas e ta simbolisá puresa i virtut. ‘Asahar’ ta un di e poko matanan ku ta floria i duna fruta pareu. P’esei mes, e ta un símbolo di abundansia tambe.

Riba e mesun banda, tin nòmber di e pais korespondiente, konektando e shelu i olanan di Karibe den un sírkulo rònt di e ‘asahar’.

Riba e banda patras, e moneda su denominashon ta aparesé entre e shelu i olanan di Karibe, meimei di un konstelashon sirkular di trinta pèrla riba un rei. E tres gruponan di 10 pèrla ta un referensia na e fecha di 10 di òktober 2010, dia ku Kòrsou i Sint Maarten a risibí státus outónomo den Reino Hulandes.

E mesun fecha ei a marka inisio di florin karibense tambe. E tres kokolishinan riba e moneda ta di e espesie ‘Arcopagia fausta’.

Komo ta trata akí di un edishon limitá, e monedanan akí lo ta di interes pa kolekshonista. Royal Canadian Mint a produsí e monedanan i nan lo drenta den sirkulashon via e bankonan komersial. Nan ta sirbi komo medio di pago legal i tin e mesun balor ku e monedanan di sirkulashon normal di 50 sèn.