WILLEMSTAD.-E sindikato ku ta representá trahadónan den kuido CBV, den un karta dirigí na e instituto Skuchami ta indiká ku e sindikato ta konsiderá ku ta simplemente inakseptabel ku gerensia di Skuchami ta manda bisa ku no por kuminsá negoshá un akuerdo kolektivo (CAO) nobo pa e trahadónan, bou di e preteksto ku no tin sèn. Na opinion di CBV, ta bisto ku e kondishonnan laboral di e trahadónan a sigui bai atras i no por sigui asina mas.

Den e karta dirigí na sra. Dijk di Skuchami, e sindikato ta mustra ku durante di último tempunan CBV semper a mustra un aktitut konstruktivo, di pasenshi i ta yuda pa buska solushon. Sinembargo nan ta konstatá ku di parti di maneho di e instituto no ta hasi sufisiente pa logra trese kambio faborabel. CBV ta bisa bon kla ku nan ta ferwagt ku Skuchami ta atendé ku minister di Salubridat i tambe ahustá nan maneho ku e meta pa logra kambio positivo.

CBV ta spera ku den un periodo kòrtiku Skuchami lo manda un invitashon ku un fecha konkreto pa kuminsá negosiashon di un CAO nobo. Mas tardansa no ta aseptabel, asina CBV ta indiká. Mas detaye den edishon di EXTRA.