WILLEMSTAD.- Sindikato di personal den kuido, CBV ta urgi gobièrnu pa bini ku palabrashonnan konkreto  riba un solushon pa ENNIA promé ku fin di aña. “Mester trese solvabilidat inmediatamente pa ENNIA. Kada un di nos grandinan mester tin pas i trankilidat promé ku fin di aña i pa yanüari e debakel di ENNIA aki ta tras di lomba. No ta bai aseptá ku niun miembro di CBV ta pèrdè un florin mas ku ENNIA”, presidente di CBV Annaliza Mathilda ta bisa durante un konferensia di prensa ayera konhunto ku sindikatonan STS ku ta representá trahadónan di ENNIA, USIBO di Boneiru, sentralnan sindikal CGTC i SSK i e asosashon di penshonado i futuro penshonadonan, ASPEN.

Alrededor di 90 porshento di miembronan di CBV tin nan seguro di penshun na ENNIA i Mathilda ta asta tribi di bisa ku gran mayoria di e kapital depositá den ENNIA Caribe Life ta di miembronan di e sindikato. “E miembronan ta meresé pa sa ku nan sèn ta garantisá. Nan ta preokupá ku kiko ta bai pasa ku nan penshun”.

Segun e presidente di CBV si ke pa salubridat tin pas i trankilidat tin ku kuminsá kaminda e trahadó mester sa ku su penshun ta sigurá i ku e por gosa di dje trankil. “Tin miembro di CBV ku a baha ku penshun i no tin pas i trankilidat. Nan ta yama tur dia ta puntra kiko ta bai pasa ku nan penshun.”

Tambe Mathilda ta atvertí ku kambia di kompania di seguro tampoko ta un siguransa ku bo penshun ta den un fondo solvabel. E ta papia di eksperensia a base di un kaso ku a pasa 4 aña pasá ku un instituto ku a bai ku su miembronan un otro kompania di seguro i a kai den mesun insertidumbre riba futuro pago di nan penshun.

“Ora e situashon di ENNIA a surgi 4 aña pasá tabatin institutonan ku a disidí di bai for di ENNIA. Esaki tabata un mal desishon pasobra na e momento ku ke a sera un seguro na un otro kompania a splika e asegurado a pèrdè riba e suma di penshun ku el sigurá pe inisialmente na ENNIA.”

Segun Mathilda asta tin kasonan ku tin kompania di seguro ku a nenga e aseguradonan i a manda e suma di depósito bèk ENNIA kaminda nan lo bolbe pèrdè riba nan penshun. “Den e tipo di kaso aki tin 400 miembro di CBV ku a presentá ku awa na wowo na e sindikato. Ta hendenan ku a pèrdè kaba. No ta kos ku ta bai pasa.”

Mathilda a atvertí tambe institutonan ku otro aña nan kontrato ta kaba ku ENNIA pa pensa bon kiko nan ta hasi promé ku nan bai un otro kompania di seguro. E presidente di CBV pa e motibu aki ta urgi gobièrnu pa tuma desishon konkreto, stòp di tira kos den laira i evitá mas kaso ku ta kousa doló bou di penshonadonan den komunidat.