KRALENDIJK/WILLEMSTAD.- Morto di Ced Ride e konmové hopi hende. E ta muri, pero lagando un herensia balioso i legado atras. Cedric Ridderplaat a nase dia 14 di yüli 1944 den Otrobanda, den e bario konosí komo Cartagena, komo yu di Pascual i Lourdes Ridderstaat. Un famia konsistiendo di nuebe ruman: 5 hòmber i 4 muhé.

Segun Ced Ride den e programa Herensia, produsí pa Fundashon Históriko Kultural Boneriano (FuHiKuBo), e tabatin un infansia i hubentut felis. Nan tabata un famia di klase medio na Kòrsou. “Mi mayornan a kasa na aña 1939 i na 1944 ami a nase. Mi ta kòrda ku na 1960 mi a kumpli 16 aña i mi tata a bisa ku mi tin mag dal un beter kuné. Un cognac. Nos tabata na bordo di un barku ku kua nos famia tabata bai biaha pa Hulanda. Mi tata a duna mi tambe sèn pa kumpra mi promé paki di sigaria. For di un mashin na bordo di e barku aki mi a saka un paki di sigaria Parliament. E dia ei, ku pa kolmo nan a pronostiká ku mundu lo a bai kaba, m’a bandoná mi infansia i bira hóben.”

Ced Ride: “Mi tata semper a impreshoná mi. E tabata un ‘selfmade man’. Un arkitekto ku por a diseñá masha bunita. E por a skirbi bunita, asta konsiderá komo kaligrafía. Mi mama tambe tabata un persona spesial den mi bida.” E kansion ‘Navidad sin Padre’, dediká na su tata defuntu, a duna Ced Ride hopi fama.

Kurandería

Hopi interes Ced Ride tabatin pa antropologia. Fo’i chikitu e tabata fasiná tambe pa kurandería, asta den tal grado ku su tata tabata ke sierto momentu pa e studia pa dòkter. “Mi tabata interesá den yerba medisinal. Tabatin un persona, Enrique Coffie, un masahista òf fisioterapista, serka ken mi a siña hopi. Mi a bai Santo Domingo, Cuba, Venezuela i otro paisnan pa siña di kurandería alternativo.”

E fasinashon di Ced Ride pa kurandería a pone ku despues el a lanta un fundashon yamá Curassow Sanashon. E tabata pone man tambe riba hende.

Religion

Ced Ride a nase i lanta komo katóliko. El a konta ku fo’i 11 aña di edat el a kuminsá kanta den misa serka Richard Simon, kompositor na fin di dékada sesenta di e famoso ‘Misa Alegre’, ku a kousa asina tantu konsternashon, tumando na kuenta ku muzik i kanto ku un toke krioyo a drenta misa.

Ced Ride: “Mi ta kòrda bon kon esei a bai. Obispu Holterman tabata kontra. Pero pader Brenneker a sostené nos. Mi tambe tabata den e promé ‘Misa Alegre’ ei, kantando ‘Tene Piedat di nos’. Tin un grabashon riba disko di e kantikanan ei. Pader Brenneker tabata yabi den entrada di ‘Misa Alegre’ den nos iglesianan katóliko.”

Hopi apresio Ced Ride tabatin pa Brenneker, kende a siñ’é kiko ta balor sosial, esta duna balor na bo próhimo. Huntu ku Ronny Lourens, Ewald Chocolaad i pader Brenneker nan tabata pasa serka hendenan den nesesidat pa hiba pan di Panaderia Aurora.

Segun Ced Ride, semper den su bida el a trata na sigui ehèmpel di su tata: traha, aportá i kanta pa bon kousa. Den esaki pader Brenneker tambe tabata un ehèmpel, un modelo, p’e.

Nashon Papiamentu

Ced Ride semper a kere den un nashon di e islanan ABC – Aruba, Boneiru i Kòrsou. El a yama esaki Nashon Papiamentu, idioma pa kua e tabatin un amor enorme, ku p’e tabata un idioma inmensamente grandi.

Ced Ride: “Papiamentu ta importante. Historia ta importante. Nos mester a profundisá mas den nos historia di sklabitut pa sa kiko a sosodé. Den e kansion di Buchi Fil ku Mosa Nena ku m’a interpretá bo ta realisá kiko tabata sklabitut.”

Boneiru

Ced Ride tabatin un amor grandi pa Boneiru. Huntu ku Nòchi Willem, Herbert Cesilia i Bòi Antoin e tabata  enkargá ku produkshon di e programa ‘Aki Boneiru’ pa TeleCuraçao. E tabata permanesé hopi e tempu ei, dékada ochenta, na Boneiru, aktuando tur fin di siman na e restorant ‘Den Laman’ di Shon Ma Rijna. Durante siman nan tabata hasi grabashon pa ‘Aki Boneiru’.

Durante e periodo ei Ced Ride a aktua tambe ku trio i otro gruponan musikal lokal. El a traha ku artista i musikantnan manera Caicai Cecilia, Robert Cicilia, Sonny Samson i vários otro. Ku Shon Ma Carolina di CCB tambe e tabatin bon relashon. Tambe ku Ars Cantandi.

Papiando di Boneiru, den e promé banda musikal ofisial den kua el a aktua tabatin e boneriano John Schermer. Nòmber di e banda aki tabata ‘Los cyclones de Ritmo’.

Den e programa Herensia Ced Ride a mustra di tabata satisfecho ku su bida. El a rekordá komo un di e momentunan importante den su bida un festival di kanto i muzik ku el a organisá di islanan ABC na 2014.

Ced Ride den e programa Herensia: “Mi a siña rekonosé i siña di mi erornan, pensa i pidi dispensa. Tambe stima i yuda mi próhimo.”