WILLEMSTAD.- Tin un suma di fl. 272.752.- ku e asosiashon Centro Barber lo tin di splika di su paradero. Kontrolaria General ta rekomendá gobièrnu pa eksigí di e organisashon  pa depositá e plaka aki bèk den kaha di gobièrnu. Ayera mainta Kontrolaria General di Kòrsou (ARC) a duna un presentashon na Parlamento riba loke nan el a konstatá den un investigashon ku el a hasi den e kaso di supsidio duná na tres instansia, kual lo mester a enserá entre otro drechamentu di tereno di futbòl i ponementu di yerba artifisial riba tereno na Barber. T’asina ku den e kaso aki gobièrnu a duna supsidio na tres instansia na Bándabou, kual nan tabata Fundashon Alegria despues di Skol (50.000 florin), Centro Barber (985.000 florin) i Fundashon Victory Boys (29.600 florin). Por sierto, e plakanan ku e dos otro organisashonnan  deportivo tabata pa kubri défisit riba nan presupuesto i kompra di un generador di koriente.

E investigashon aki di ARC a ser hasí a base di un moshon di Parlamento di Kòrsou for di mei 2018 ya ku tin plakanan a kambia di destinashon sin duna splikashon.

Sra. Janella Cathalina, direktora di ARC, a duna un presentashon i a duna e resultadonan bisando entre otro ku fundashon Formashon i Alegria despues di skol su petishon no a ser entregá na tempu, e no tabata kompleto, no a ser dirigí na e Minister di Enseñansa, Deporte i Kultura. Es mas, konseho di minister a desviá for di e reglanan pa ku maneho di supsidio, miéntras ku gobièrnu no a firma un akuerdo ku e fundashon aki. Gobièrnu tampoko a hasi e tarea nesesario pa e minister por a disponé di e medionan pa por a paga e supsidio. E ministerio no por a proba ku tin un desishon di gobièrnu pa loke ta otorgamentu dje montante pidí.

Es mas, ta despues di 9 aña ku e kaso aki a tuma lugá e ministerio a aserka e fundashon. Pues nunka a supervisá uso di e supsidio otorgá.

Centro Sosial Deportivo Barber:

Pa loke ta e resultadonan den e kaso aki, e petishon aki tampoko tabata na tempu ni kompleto, ni entregá na e minister konserní, ni kanalisá via di e ministerio konserní. Gobièrnu a trata e petishon sin ku e instansia tabata na altura di e puntonan esensial. Na momentu di duna e supsidio gobièrnu a desviá for di regla i tampoko a firma un akuerdo di koperashon ku e asosiashon. E ministerio di Enseñansa, Siensia, Deporte i Kultura no por a proba dikon a desviá for di regla.

Segun sra. Cathalina, di akuerdo ku e ordenansa di supsidio, ora ku un instansia risibí un suma di mas ku 300 mil florin, e mester responsabilisá pa medio di un relato anual i deklarashon di akountent, i esaki no a sosodé. Ademas a keda un suma di mas ku fl. 272.752.- ku e asosiashon no a supstansiá ku faktura den e responsabilisashon ku nan a entregá. Gobièrnu tabatin supervishon na su enkargo pero e no a resultá den pasonan konkreto ku lo mester a resultá den revokashon di e suma pa motibu ku a desviá for di e meta pakiko e supsidio a ser duná, kual tabata pa pone yerba artifisial riba e tereno di futbòl di Barber.

Finalmente den su rekomendashonnan ARC ta bisa gobièrnu ku tin di eksigí di e asosiashon Centro Barber pa depositá e suma di plaka ariba menshoná bèk den kaha di gobièrnu.