WILLEMSTAD.- E Kolegio pa Supervishon Finansiero, konosí komo CFT, ta bai tin un ròl importante den e trayekto di COHO tambe. Esei ta algu ku a keda konfirmá den e enkuentro ku prensa konvoká ayera tardi. Sr. John de Lannoy a splika entre otro ku e supervishon finansiero ta keda remplasá pa un kontròl presupuestario ehekutá pa CFT. CFT ta kontrolá si e invershonnan pa reformanan ta korektamente reflehá den nos presupuesto. Alabes nan ta kontrolá si e presupuesto ta kontené elementonan ku por opstakulisá e pakete di pais (landspakket). E struktura aki ta algu nobo kaminda lo pidi konseho di Raad van State riba dje.

Supervishon finansiero ta nifiká ku nan ta disidí kon i pakiko bo ta saka e sèn. Pero den e kaso aki e por trese konfushon pa motibu ku lo tin dos entidat ku lo por hasié. Pero esei ta algu ku a skrap e for di e lei i na su lugá a bini ku e kontrol presupuestario.

Segun de Lannoy, na lugá di un lei di Reino pa instituí en entidat i bini ku reforma, awor ta trata na bini ku un areglo di kolaborashon entre e kuater paisnan pa realisashon di reforma i desaroyo.

Pero tur e reformanan aki ta bai kosta plaka. Kisas algun di nan nos lo haña den forma di supsidio, òf regalo pero gran parti di dje ta nos mes lo tin di bai paga. I si esei ta e kaso, e reformanan mester ser reflehá den presupuesto. Lo wak si tin plaka riba presupuesto pa ehekutá e reformanan ei. Tin di wak tambe otro invershonnan ku lo no ta kontra di e landspakket i e reformanan.

Segun de Lannoy, e manera kon e lei ta hinká den otro awor klaramente e ta un lei basá riba koperashon i no un lei ku ta den un solo direkshon. Es mas, den e negosiashonnan ku Hulanda por a sinti ku tin un tiki mas koperashon, i e base di koperashon tambe por mira bèk den e lei.

Awor loke ta bai sosodé ta ku Kòrsou lo bai Raad van Advies ku e lei pa konseho riba e kambionan ku a pidi. E lei lo bai pa Konseho di Minister di Reino pa evaluashon. Despues di 3 di sèptèmber e proyekto di lei lo ser entregá na e diferente parlamentonan ku lo disidí si nan ta aprob’é òf no. Ta ferwagt ku e proseso aki lo bai tuma tempu te por lo ménos desèmber 2021.