WILLEMSTAD.- Kolegio di Supervishon Finansiero (CFT), den un karta dirigié na minister di finansa Kenneth Gijsbertha i na presidente di Parlamento William Millerson a reakshoná riba e karta ku gobièrnu a manda, fechá 12 di sèptèmber último. Den e karta di gobièrnu na CFT a splika ku e desishonnan tuma ta kubri e riesgonan den presupuesto sufisientemente. Sinembargo den e karta ku a bai pa minister Gijsbertha i Staten awe CFT un bia mas ta ekspresá preokupashon serio pa situashon finansiero ekonómiko di Kòrsou i ta bolbe duna gobièrnu Kòrsou tempu te ku 9 òktober próksimo pa tuma e medidanan nesesario si no ta konsehá Konseho di Minister di Reino pa duna Kòrsou un instrukshon (aanwijzing).

Cft a risibí kontesta di gobièrnu 12 sèptèmber último. Den e karta aki minister Gijsbertha ta insisti ku e presupuesto 2018 ta hopi realistiko i ku e ta balansa. CFT ta insisti ku e presupuesto 2018 manera minister Gijsbertha a presenta na CFT no ta sufisiente. Mester indiká ku e karta di CFT a bai pa Staten tambe, kontrali na e palabrashon original esta ku ta kuminika ku gobièrnu prome i despues di 2 siman kartanan ta bira publiko. Pues sigur ku minister Gijsbertha lo no ta ‘amused’.

CFT a tuma nota di e karta ku premier Rhuggenaath a manda pa premier Rutte, splikando ku ekonomia na Kòrsou no ta krese i ku tin problema pa duna servisio etc. CFT ta rekonosé tur e problemanan ku premier Rhuggenaath a indiká. CFT ta apresio e pasonan ku gobièrnu di Kòrsou a tuma despues di nan karta di 29 ougùstùs 2018, pero te ainda ta insisti ku riba puntonan importante gobièrnu di Kòrsou no a hasi sufisiente.

Cft no ta konfia masha ku e kobransa di belasting lo generá muchu i ta para riba pa bin ku medida adishonal pa generá 30 mion adishonal. Esaki tambe mester keda implementá den un adaptashon di presupuesto pa mas tarda 9 òktober próksimo. Tampoko CFT no ta konfia masha ku gobièrnu lo haña e 37 mion di UTS na dividendo.  CFT ta kere ku 2.6 mion di pago adelantá ta parse faktibel, pero e sobra 34.4 mion si CFT ta kere ku mester tuma otro medida pa garantisá esei.