CFT ta rekomendá pa brinda yudansa prome ku 15 aprel 2020

WILLEMSTAD.- Tin apénas algun siman ku Corona vírus a yega Kòrsou i ya kaba por nota e impakto grandi ku e tin riba bida diario den e komunidat aki. Praktikamentu tur hotèl ta será i asina tin basta otro kompania den tur sektor i no papia mes ku skolnan, krèsh i opvang tur ta será loke tambe ta pone un preshon enorme riba tur famia. Kolegio di Supervishon Finansiero (CFT) den un karta na Konseho di Minister di Reino (RMR) ta duna konseho positivo pa e petishon di yudansa ku Kòrsou, Aruba i Sint Maarten a hasi na gobièrnu ulandes/gobièrnu di Reino.

CFT ta splika ku e krísis kousá pa Corona lo tin un impakto di tal magnitut ku mester kuminsá pensa riba palabrashonnan di mas aña i tambe kon mester bai atendé ku desviashon for di normanan establesé. E kolegio ta mustra ku asta prome ku Corona ya kaba e paisnan tabatin problema ku nan presupuestonan i sigur e aspekto di maneho finansiero. Tur e paisnan tin presupuesto ku défisit i nan ta surpasá e nivel di debe manera Fondo Monetario Internashonal ta stipulá. E efektonan di e krísis mundial ku yama Corona vírus ta bai dal e paisnan aki hopi duru i lo pone ku nan nivel di debe lo oumentá barbaramente. E echo ku Ulanda ta inskribí riba tur emishon di bono ta pone ku riba tèrmino kòrtiku e efektonan lo no ta desastroso pa Korsou i Sint Maarten, pero den kaso di Aruba si e situashon ta diferente. Aruba lo por keda konfrontá ku tasa di interes ku ta subi. Pa e motibu ei ta urgente pa hasi palabrashon ku e paisnan pa eliminá e debe.

CFT ta rekomendá RMR pa bai di akuerdo ku petishon di Korsou i Sint Maarten pa desviá for di e art. 15 insiso 1 di e lei di Supervishon Finansiero den Reino (Rft) pa loke ta trata kumplimentu ku e norma di presupuesto. Meskos ta konta pa Aruba den e protokòl di 21 d novèmber 2018. Kondishon importante ta pa eksigí pa e paisnan fiha nan presupuesto prome ku 1 di mei próksimo òf bini ku presupuesto supletorio pa e fecha menshoná.

Ta konsehá pa laga e paisnan duna reportahe tur luna na Cft riba nan posishon di likides pa tene esakinan na kuenta den tratamentu di petishon pa sosten finansiero. Ta konsehá RM pa atendé e kasonan aki i kumpli ku e prome parti di yudansa na e paisnan promé ku 15 di aprel próksimo. Mas detaye den edishon di EXTRA.

 

SHARE

LEAVE A REPLY