PHILIPSBURG.- Ta ferwagt ku Sint Maarten lo realisá un surplus riba e servisio ordinario (gewone dienst) den 2023. Pa awor e invershonnan ta kedando atras kompará ku e presupuesto aprobá di 2023. Kolegio di supervishon Kòrsou i Sint Maarten (Cft) ya pa basta tempu ta preokupá pa aprobá e presupuestonan na tempu. Cft ta urgi Sint Maarten pa duna prioridat na aprobashon di presupuesto 2024 i pa añadí un planifikashon di invershon multi-anual na e presupuesto aki.

Te ku awe Sint Maarten no a logra pa yega na tempu na un presupuesto aprobá. Tampoko no a aprobá e adaptashon di presupuesto 2023 ainda. Cft ta enfatisá ku ta importante pa disponé di sufisiente kapasidat pa e propósito aki. Último añanan Sint Maarten no a logra di hiba e invershonnan (ekskluyendo invershon di fondo fidusiario) na un nivel mas haltu. Den e presupuesto aprobá di 2023 Sint Maarten a inkluí un suma di ANG 90 mion pa invershon. Sint Maarten ta hasi un fiansa pa mayoria parti di suma aki (ANG 61 mion). Cft a konsehá Sint Maarten pa kuminsá ehekutá e invershonnan planeá mas lihé posibel.

Hulanda a akoplá un solushon duradero pa e fail di ENNIA na e refinansiamentu di e fiansanan pa sosten di likides. E solushon ku Sint Maarten i Kòrsou a skohe resientemente, kual ta un likidashon kontrolá, Cft ta konsiderá ménos riskante ku un komienso nobo di ENNIA. A base di e solushon aki, Sint Maarten i Hulanda yega na un akuerdo pa un refinansiamentu di e fiansa pa ayudo di likides na un interes di 3,4 porshento.

Cft a deliberá ku e minister di Finansa tokante e retraso den e reforma fiskal i modernisashon di e Departamento di Impuesto. Esakinan ta nesesario pa oumentá e entradanan di impuesto. Sint Maarten ta trahando riba reforma di impuesto di alohamento riba hür di kas na turista i introdukshon di un impuesto pa turista na yegada. Cft ta konsiderá esei un desaroyo positivo, pero ta enfatisá ku un revishon mas amplio di e sistema fiskal ta keda ketu bai mes nesesario.

Sint Maarten ta trahando na reforma pa redusí e défisitnan kresiente den e fondonan di kuido. Sint Maarten ta spera di dal un paso importante den e kuadro aki ku introdukshon di un seguro general pa gastu médiko. Cft a ekspresá su preokupashon pa implementá esaki na tempo. Un retraso por hiba na gastu adishonal pa e pais. Ademas, e pais tin debe na Órgano Ehekutivo di Seguro Sosial i Médiko (SZV). Si Gobièrnu paga su debe, esei lo resultá den mehorashon di posishon finansiero di SZV.