WILLEMSTAD.- Ayera den un ambiente ameno na Scuba Lodge Boutique Hotèl den Pietermaai, Chata a honrá empleado i supervisornan den e diferente departamentonan di horeka pa e promé kuartal di aña.
Tur e nominadonan a haña regalonan di Cinemark Curaçao i di United Distributors.
Kada kuartal Chata ta konsentrá riba diferente kalidat di empleadonan ku ta hasi nan esfuerso den nan trabou den e industria di turismo i hospitalidat. E konsentrashon di e kuartal aki ta pashon.
Segun presidente i CEO di Chata Miles Mercera a bisa “den e sektor di hospitalidat hopi biaha nos ta lubidá ku un di e kosnan ku ta hasi nos úniko ta e pashon pa nos trabou. Hopi biaha nos tin di surpasá, bira di banda, aki i aya for di nos deskripshon di trabou pa asina por komplasé e kliente pa asina e ta 100% satisfecho. Nos ta komprondé ku turismo ta mas ku sirbi un dushi kuminda i chek in hende na Front Desk. E ta mas bien entrega un eksperensia inolvidabel.
E empleadonan honrá ta Thagea Curie di Baoase Luxury Resort komo e promé trahadó di restorant, Quenton Panneflek di Hilton Hotèl komo e ‘bankueting Houseman’, Janice Selebon di Karakter BV komo kòki, Skylina Servanie di Papagayo Beach Club komo sirbidó den restorant, Josefa Dorand Herrera di Kontiki Beach Resort komo limpiesa general. Mattheus Gordon di Santa Barbara Beach Golf Resort komo ‘Commis Chef 1’. Ruthseli Magdalena di Ocean Encounters komo Divemaster, instruktor asistente i kapitan di boto i Jedrek Magdalena di D&I Business Support Services komo Wizard.
Den kategoria di supervisornan a keda honrá, Norman Martina di Hilton Hotèl komo supervisor F&B, Loes Winkelmolen di Karakter BV komo supervisor di weiter, Mauritz Mathilda di Kontiki Beach resort komo supervisor di servisio na wéspet, Syneuve Brandao di Sta Barbara Beach komo supervisor ‘pastry’ i Marisol Adames di Zanzibar Beach & Restorant komo supervisor Zanzibar.