WILLEMSTAD.- Abogado i eks-formadó Chester Peterson no ta bira minister di Hustisia pa MFK. Esaki Peterson a konfirmá na Extra. E siman aki a sali diferente nòmbernan den prensa komo kandidato pa bira minister di Hustisia pa MFK. Korant ‘Bala’ djaweps 8 di yüli a skirbi ku Peterson ta e kandidato preferí di MFK. Segun e korant Peterson a duda pa motibu ku e salario ku e ta gana komo abogado ta hopi mas haltu ku un salario di un minister. Na otro banda e korant a menshoná ku Peterson a wòrdu di ‘screen’ kaba pa e por traha komo formadó. Ku ta nifiká ku e por wòrdu nombrá hopi lihé.
Pero Peterson mes a bisa EXTRA ku e notisia no ta bèrdat. Otro nòmber ku a sali resientemente ta di Rigo Thode komo minister di Hustisia. Segun presidente di partido MFK, sr. Sithree ‘Cey’ van Heydoorn, den e partido últimamente no a papia tokante un kandidato nobo pa posishon di minister di Hustisia. Asina Van Heydoorn resientemente a bisa EXTRA.
Van Heydoorn a bisa ku tampoko e no sa for di unda notisianan ta sali ku ku tin diferente kandidatonan.

PORTRET
Eks-formadó Chester Peterson (mei mei)