WILLEMSTAD.- Ayera durante di oranan di mèrdia Personal di Kuerpo di Bombero Kòrsou a keda dirigí pa Cherokezenweg na Groot Kwartier despues di a risibí informashon di un kas den dekadensia ku lo mester tabata na kandela.
Na nan yegada a topa ku un kas no habitá ku tabata kompletamente na kandela.
Mesora a kuminsá ku trámitenan pa paga esaki i asina evitá ku e lo por a pone demas kasnan den e área na peliger.
Bisiñanan a indiká ku nan tin tur sospecho ku ta drogadiktonan lo a sende esaki na kandela debí ku konstantemente e drogadiktonan ta den e kas i tira sushi den esaki. Asta bisiñanan a indiká ku no ta promé bia ku personanan ta sende kandela di un forma intenshonal den e área.
E kandela aki a kousa hopi molèster di huma pa personanan den e área.