WILLEMSTAD.- E berdadero identidat di e yu di Kòrsou ta sintá den e diversidat den unidat ku ta manifestá su mes den tur aspekto di bida den nos komunidat.

Jean Girigori, ku su piesanan partikular, ta enrikesé nos kultura ku arte ku e ta pinta nos bida diario den su propio manera úniko.

Bishitantenan ku bishitá Passaatsteeg den Punda lo nota un transformashon tumando lugá pa e hanchi bira un berdadero hanchi di arte outéntiko. Jean su pinturanan riba muraya di e edifisionan históriko, a keda kombiná den un hòfi urbano pa krea un ambiente úniko i un eksperensia kultural. CIBC FirstCaribbean ta honrá di sostené Jean Girigori den su esfuerso debí ku no únikamente e ta kontribuí na enrikesé nos sentro di siudat, ku un lugá mas kaminda di bèrdat bo por eksperensiá e esensia di nos komunidat, pero tambe ta mehorá e produkto turístiko ku Kòrsou tin pa ofresé.

“Nos di CIBC FirstCaribbean ta rekonosé e kontribushon grandi ku Jean Girigori tin pa nos herensia kultural. E inisiativa pa desaroyá un hanchi kaminda su negoshi ta den un eksperensia kultural, durante di e tempunan difísil kousá pa e pandemia, ta di aploudí i mester sirbi komo ehèmpel pa nos tur. Nos ta sinti nos honrá di por kontribuí pa hasi esaki un realidat i ta invitá nos komunidat, pero tambe turistanan, pa bin i deskubrí e espasio úniko aki den sentro di Punda” Timba Engelhardt, CIBC FirstCaribbean su Country Head na Kòrsou a bisa.

E artista Karibense Jean Girigori, un berdadero embahador di Kòrsou, ta konosí pa su pinturanan kolorido, ku ta representá e kultura di Karibe. Jean no ta únikamente konosí na Kòrsou, pero tambe den Karibe, Europa i Merka.

Su pashon i perseveransia ta algu kontagioso. Punda a sufri hopi debí na e ousensia di turistanan debí na e pandemia di COVID-19. Jean su tayer, situá den Passaatsteeg, tambe a sufri. Esaki no a prevení e di hasi loke e sa di hasi mas mihó, esta krea arte.

El a tuma e inisiativa i a traha pa kombertí e hanchi den un eksperensia kultural.

E área fresku pintá, ku ta eksponé e arte di Jean Girigori, kombiná ku den un hòfi urbano outéntiko lokal, lo duna un balor agregá na e produkto turístiko di Kòrsou asina turistanan regresá bèk nos isla i Punda.