WILLEMSTAD.- “Loke ta pasando ku pais ta konsekuensia di falta di liderazgo. Un pais mester di un lider fuerte ku un vishon kla definí ku ta forma e base pa un programa di gobernashon sólido. For di e programa aki mester sali plannan konkreto pa kada ministerio implementá i asina duna direkshon na pais. Komo un lider kapas ta duna alabes informashon ofisial kontinuo na komunidat pa asina poblashon ta na altura di e rumbo ku pais ta bai aden.”

Asina miembro di Parlamento pa Partido Nashonal di Pueblo (PNP), Ruisandro Cijntje, ta duna di konosé. “Mi a trese e falta di liderazgo akí dilanti den pasado resien i ta konstatá ku ainda nada a kambia. E lider di pais ta e minister presidènt, pero den gabinete Pisas III ta mira mas ku nunka ku ministernan individual ta sali riba media sosial duna deklarashon i kada un ta duna un otro direkshon ku ta kana aden.”

Un ehèmpel di falta di liderazgo, segun Cijntje ta e diskushonnan andando riba indeksashon di penshun di behes (AOV). Minister presidènt, Gilmar Pisas, ta esun ku mester sali duna klaridat i direkshon, e ta bisa. “Pero, pasobra e no ta hasi esaki otro ministernan ta duna deklarashonnan kontradiktorio kaminda ta trese bruashon i krea separashon bou di penshonadonan.”

Den e kuadro aki e parlamentario pa PNP ta mustra ku miéntras ku Minister di Desaroyo Sosial, Labor i Bienestar ta deklará públikamente ku e ta rekonosé e debe ku tin na penshonadonan, pero ku mester wak kon ta bai paga esaki, minister di Finansa di su banda ta bisa ku penshonadonan mester bai korte pa buska nan derecho pa indeksá e AOV. “Esaki ta un falta di rèspèt pa nos grandinan.” Otro ehèmpel kaminda falta di liderazgo ta hunga un ròl ta refineria Isla, Cijntje ta sigui bisa.

Minister presidènt di Kòrsou, den porta di elekshon a bini ku otro promesa falsu bisando ku pronto ta habri e refineria, pero e realidat a resultá nèt kontrali, e parlamentario ta bisa mas aleu. “No tin aktividat riba tereno di refineria, miéntras ku na Aruba si ta mira ku ta tuma desishon konkreto riba futuro di refineria kaminda lo desmantelá e instalashonnan bieu, limpia e tereno i lansa proyektonan grandi di energia renovabel. Tur esaki a base di un vishon i plannan konkreto di e gobièrnu.”

Na Kòrsou, Cijntje ta enfatisá, ta kambia nòmber di Refineria di di Kòrsou den 2Bays, Oryx ta kambia nòmber i bira VIGOR, pero realidat ta ku ta e mesun personanan ta envolví tras di kortina. Mas ehèmpel di falta di liderazgo ku e ta trese dilanti ta e situashon geo-polítiko den region. Spesífikamente e tenshonnan entre Merka i Venezuela.

“Atrobe mester konstatá ku minister presidènt, ku mester ta e lider di gobernashon, no ta duna informashon. E no ta papia di senarionan ku por tuma lugá ku e konsekuensia ku pais ta kore peliger ku e situashon di tenshon por kue tur hende for di base. Minister presidènt no ta tene konferensia di prensa semanal pa duna informashon riba tópikonan di interes general.”

Realidat pa Cijntje ta ku no tin un liña den gobernashon di pais. “Kosnan ta tuma lugá ‘ad hoc’ i no tin planifikashon. Niun hende no sa kon ta pará ku seguridat di pais, ki ta bai pasa ku refineria, kon ta bai drecha enseñansa, kiko situashon finansiero real di pais ta òf kiko ta e vishon ekonómiko pa próksimo 5, 10 i 20 añanan.”

Na su opinion ta e situashon akí ta krea konfushon i diskushon riba entre otro situashon na servisio di impuesto i indeksashon di penshun di behes. “I, pasobra no tin hende pa kulpa pa lokual ta pasando, ta mira ku den e aktual gobernashon mes ta kuminsá kulpa otro. Pues, si na final di dia no tin un lider ku ta duna direkshon na pais, Kòrsou lo no logra progreso pasobra oportunidatnan ku presentá ta sigui bai pèrdí.”

Foto: