WILLEMSTAD.- Organisashon di medio ambiente Clean Air Everywhere ta enfatisá ku riba tereno di refineria Kòrsou por krea un industria nobo i moderno. ‘Si e industria ta tene su mes na normanan di salubridat i medio ambiente e por ta hopi eksitoso. Nos ta mira esaki na Oropa kaba.’ Segun Gert Mulder di Clean Air Everywhere den industria di refineria na Oropa diferente kompanianan a invertí pa krea un industria limpi i moderno. ‘Nos por hasi esaki na Kòrsou tambe.’ Mulder den un komunikado di prensa ta skirbi ku na Kòrsou tin un tereno di 500 hèktar disponibel den Schottegat. ‘Banda di esei tin un tereno grandi na Bullenbaai ku pa basta aña no ta produsí nada. Ámbos Schottegat i Bullenbaai ta dos alokashon hopi bon ku hopi posibilidat pa desaroyo. Por krea hopi kuponan di trabou ku perspektiva. Nos mester tin kompania ku ta inovativo, industria di futuro, no di pasado.’ Segun Gert Mulder proyekto nobo ku refineria di Kòrsou a presentá aña pasá, ‘Horizonte Nobo’ ta un bon ehèmpel di e direkshon nobo.
Manera ta konosí siman pasá wes a duna sentensia den un huisio sumario ku CAE a entamá kontra Pais Kòrsou. Ku e huisio sumario CAE a pidi wes pa duna klaridat tokante normanan di polushon pa refineria ora e ta habri bek. Segun Mulder si e sentensia ta mustra un kos, esaki ta ku ‘wes ta enfatisá ku gobièrnu tin ku protehá pueblo di Kòrsou kontra polushon grandi di airu’. Den su komunikado di prensa e ta splika ku e sentensia no tin nifiká ku refineria no por habri porta bek. E sentensia ta habri e porta pa un industria moderno na Kòrsou, segun Mulder.