‘Of pidi sindikatonan despensa’

WILLEMSTAD.- Gabinete Pisas mester sea distansia su mes for di deklarashonnan di vise promé minister, Charles Cooper òf saka un karta i pidi e sindikatonan ku ta representá trahadónan di gobièrnu despensa. Si no hasi esaki ta nifiká ku e gabinete kompleto, esta tur aktual minister ta para tras di e ekspreshonnan sumamente arogante di Cooper ku a bisa ku gobièrnu no ta sinta ku sindikatonan. Asina kolaboradó di frakshon di MAN, Eugene Cleopa ta enfatisá.

Cleopa ta referí na e konferensia di prensa di gobièrnu di Kòrsou di djárason 18 sèptèmber kaminda Cooper a bisa ku ta solamente den seno di GOA minister di Maneho di Gobernashon, Planifikashon i Servisio Públiko ta papia ku sindikatonan. “No por t’asina ku un minister ta deklará ku e no ta sinta na mesa ku sindikatonan”, Cleopa ta indiká. E ta mustra ku Cooper a hasi e deklarashon aki den un konferensia di prensa di gobièrnu.

E ke sa kiko ta posishon di gobièrnu òf ministernan individual riba e deklarashon aki. “Cooper a krusa un liña ora el a bisa ku e no a sinta ku sindikatonan den pasado i no ta sinta ku nan aworakí i tampoko den futuro. Bisando ku e no ta sinta ku sindikatonan, e minister ta bisa ku e no ta sinta ku e trahadó di gobièrnu ku ta parti di e pueblo votadó di Kòrsou.”

Cleopa ta sigui splika ku por mira e sindikatonan komo portabos di e trahadó ku ta parti di e pueblo. “P’esei mi ke sa si gobièrnu den su totalidat ta pará tras di e deklarashon di Cooper. Si esaki no ta e kaso gobièrnu tin ku saka un komunikado pa desmentí e ponensianan di Cooper.”

Turesten ku gobièrnu no trese klaridat riba su posishon relashoná ku deklarashonnan di Cooper, mester sali for di e punto di bista ku gabinete Pisas ta di akuerdo ku loke Cooper ta vosiferá i e posishon ku el a asumí, esta Cleopa. “Bo no por sinta den Fòrti i pretendé di no ta sinta ku representante di trahadónan. Si bo ke ta minister i sinta den Fòrti bo mester ta dispuesto pa sinta ku tur grupo representativo den komunidat, inkluso sindikatonan.”

Finalmente Cleopa ta bisa ku minister Cooper por tin un opinion personal kon e ta mira sierto hende òf grupo den komunidat, pero komo minister e mester tin e disponibilidat pa papia ku tur hende i no por ta trata di e forma arogante manera el a hasi. “Den un karta ofisial pa Kolegio Supervishon Finansiero gobièrnu a bisa ku ta bai eliminá e lei pa kòrta ku 12,5 porshento den kondishon laboral di ámtenarnan. Kiko ta kita for di bo pa papia ku sindikatonan riba e punto aki ku tin di aber ku kondishon laboral di nan miembronan.”

Foto:

...Eugene Cleopa...