WILLEMSTAD.-  Gabinete Pisas mester duna klaridat mas lihé posibel riba benta di kasnan di Fundashon Kas Popular (FKP) na hendenan ku tin hopi aña ta hür e kasnan aki. “Ki dia ta bende e kasnan di FKP a base di nan balor i e kantidat di aña ku e habitante ta hür e kas”, kolaboradó di frakshon di MAN, Eugene Cleopa ta bisa.

Segun Cleopa durante último 2 pa 3 periodonan di gobernashon gobièrnunan di turno a papia riba e posibilidat pa  bende e kasnan di FKP ku esnan ku tin hopi aña ta hür un di e kasnan aki na un ‘preis di famia’. E ta bisa ku ya kaba ta den luna di mei di lokual ta e último aña di e periodo aktual di gobernashon, pero ainda no a kuminsá ku benta di e kasnan.

Cleopa ta di opinion ku a krea un espektativa i gobièrnu mester bisa algu pa kaba riba benta di e kasnan. “Tin 2 vershon riba benta di e kasnan. E promé vershon ta ku promé minister Pisas den un reunion ku Fundashon E hende a bisa ku ta bai bende e kasnan. E di dos vershon ta ku minister enkargá ku FKP, Charles Cooper a bisa ku no por mete den su kartera kon ku ta i ku tin ku kana un proseso promé ku yega na benta di e kasnan.”

Pa e kolaboradó di frakshon di MAN ta imperativo ku ta bini klaridat ta kua di e 2 vershonnan aki ta korekto. E ta mustra riba e echo ku e parlamento a pasa un moshon ku mester bende e kasnan.

“Ki ora pueblo su bùrt ta yega pasobra ta hopi aña pueblo tin ta warda pa nan por kumpra e kasnan ku nan ta biba aden”, Cleopa ta terminá bisando.