WILLEMSTAD.- Parlamentario Eugene Cleopa ta sumamente kontentu ku gobièrnu ta ehekutando trabounan di asfaltamentu di kayanan den mal estado. Pero loke si e ta desaprobá ta ku ta asfaltá e kaya unda su kas ta situá, no ta asfaltá e kaya kompleto, kreando e impreshon ku ta algu ku el a regla pe mes sin tene kuenta ku sobrá. E tin motibu pa pensa ku ta trata aki di un obra di karakter polítiko, kual e no ta akseptá. Asina Cleopa a duna di konosé den un reakshon pa EXTRA ayera nochi.

Den deklarashon pa EXTRA el a bisa ku e ta sumamente desapuntá despues di a tuma nota kon e asfaltamentu a tuma lugá. A asfaltá un parti di Blomonteweg, e kaya den kual e ta biba, pero solamente un parti, por sierto te na su kas, i laga sobrá kaminda ku buraku. Na su opinion esaki ta krea un ambiente polítiko sin presedente.

E ta laga e impreshon komo sifuera el a regla pa asfaltá te na su kas i lagando otro hendenan den e hanchi ei na kaya, siendo ku nan tambe tin e mesun derechi di mira nan kaminda asfaltá. Pero el a sinti e kontroversia i a yama e servisio konserní mesora. El a papia tambe ku Minister sra. Zita Jesus-Leito kende a duna di konosé ku e no ta direktamente envolví ku proyektonan di asfaltamentu, sino ku ta algu ku ta den man di DOW. Es mas, el a komprondé ku ta te na e alturanan ei por a asfaltá e kaya, pa motibu di skarsedat di fondo.

Segun e parlamentario di frakshon di MAN, e no por kaba di komprondé algu manera esaki pa motibu ku e ta asumí ku ora ta plania pa asfaltá un kaya, tin di hasi esaki kompleto si. Den e kaso aki tin un parti ku a keda malu ainda ku yen buraku. No tin lógika den e kos aki. I e tipo di kosnan aki lo por krea diskordia den bario presisamente pasobra tur hende sa ku e ta den polítika. Ku su reakshon e ke evitá ku riba retnan sosial ta surgi atakenan infundá den su direkshon.

E no por kita for di e impreshon ku ta trata aki di algu di karakter polítiko, pa hinka su persona den un lus negativo. Den un kombersashonnan informal ya kaba hende a kuminsá puntra I kuestioná un ke otro.

Den bario a hasi apelashon pa pone drèmpel, loke el a hasi tambe aunke te ainda no a konstruí esakinan. Awor e tin asta miedu di puntra kon ta pará ku e drèmpelnan.

Pero via di kanalnan ofisial sr. Cleopa a dirigí un karta na e minister konserní pidiendo aklarashon dje situashon aki.

https://extra.cw/e-tin-motibu-pa-kere-ku-ta-hasimentu-di-politika/