WILLEMSTAD.- Eks parlamentario i siudadano, sr. Eugene Cleopa, ta preokupá ku e situashon aktual den kual tin hopi molèster di muskita. Asina el a duna di konosé na EXTRA e siman aki. Segun sr. Cleopa, último lunanan nos a haña nos mes konfrontá ku un periodo largu di yobida ku riba su mes tabata di apresiá, sigur teniendo kuenta e periodo largu i ekstenso di sekura ku nos isla a pasa aden.

Awor konsekuensia di yobida ta ku tur kaminda yerba ta krese. Esaki ta un kondishon ideal pa sangura. Sangura ta multipliká kaminda tin awa ta keda para meimei di yerbanan. Pero segun Cleopa e mesun kondishonnan aki lo ta faborabel pa muskita tambe pasobra último tempu na tur parti di Kòrsou tin hopi muskita.

Pues e lo kier a hasi un apelashon riba Minister di Salubridat, sra. Zita Jesus-Leito, pa e na su turno aserká e departamento kompetente pa hasi algu na e situashon aki. A lo ménos por investigá pa sa e motibu. Den pasado barionan den bisindario di Malpais a kulpa Selikor pa e manera kon tabata deshasí di sierto desperdisionan na landfill. Pero den e kaso aki ta kasi tur kaminda tin e mesun problema.