‘Kiko nos a hasi último 3 aña anto?’

WILLEMSTAD.- Ta un bèrgwensa pa tuma nota kon minister di Hustisia di Kòrsou ta bai Aruba pa wak implementashon di un proyekto di kámara di vigilansia pa pueblo. Asina kolaboradó di frakshon di MAN, Eugene Cleopa ta opiná.

“Nos mester tin bèrgwensa. 3 aña largu no a hasi nada ku e asuntu di kámara di vigilansia. Ta baho mundu tabata manda i/òf disidí riba nos minister”, Cleopa ta puntra.

Un delegashon di Kòrsou inkluso minister di Hustisia Shalten Hato tabata resientemente na Aruba kaminda el a haña un presentashon di 3 kompania huntu ku Kuerpo Polisial di Aruba riba funshonamentu di un proyekto ku a inisiá 2022 di kámara di vigilansia. Aworakí Aruba tin 300 kámara di vigilansia instalá na diferente sitio i lo sigui amplia esakinan segun minister di Hustisia di Aruba Rocco Tjong.

E presentashon tabata rondó di e “Operation Command Center” ku ta bai habri na Aruba. Den e sentro aki tin un sentral, hendenan ku ta risibí yamada i tambe un kamber di radar.

Segun minister Tjong ta splika ku realisashon di e proyekto di kámara di vigilansia ta duna kontenido na uso di informashon “real time” pa hasi investigashon. Esaki segun e minister ta hasi posibel pa traha mas efisiente i resolvé kasonan mas lihé.

Tambe e sistema aki ta kontribuí na mihó protekshon i seguridat di agentenan polisial e minister di Aruba ta sigui bisa. “Por brinda polisnan ku ta traha riba kaya ku informashon segun ku susesonan ta tumando lugá loke ta duna mihó garantia di nan seguridat.”

Segun minister di Hustisia di Kòrsou, Shalten Hato, Kòrsou tin reto ku su proyekto di kámara di vigilansia i ta bon oportunidat pa a tuma nota di loke Aruba ta hasiendo uso di e último teknologia den nan sentral. Tambe e minister a hasi uso di e oportunidat pa elaborá ku su kolega di Aruba riba diferente reto ku Kòrsou i Aruba tin den komun.

Tumando nota di e bishita di Hato na Aruba, Cleopa ta bisa mas aleu ku e tin su dudanan si e minister di Hustisia tin kòntròl riba niun área di maneho. E ta mustra ku pa mas ku 9 aña kaba Kòrsou tabata e pionero riba instalashon di kámara di vigilansia profeshonal.

“Nos tin hendenan lokal prepará pa atendé ku e kámaranan aki. Bou di èks minister di Hustisia, Nelson Navaro e proyekto aki a kana i tabatin un vishon i un maneho ku a implementá.”

Segun Cleopa a logra solushoná hopi krímen usando e kámaranan di seguridat. “Pa awe mi tende ku minister Hato den rekta final di su periodo komo minister ta bai wak na Aruba kon ta implementá kámara di vigilansia ta un bèrgwensa”, Cleopa ta terminá bisando.

Foto: