E bunitesa di e muhé ‘brunette’ ta digno di ser selebrá, i e esaki ta e kaso ku e último produkshon di Clifton End titular ‘Morena’.  Clifton End e aña aki a zona bastante riba kartelera musikal ku entre otro “Wat is je Naam” huntu ku Buleria. Apesar di e tempu ku hopi reto ku COVID-19 a trese kuné, Clifton no a sinta ketu, pero a hasi uso di e oportunidat pa e bin ku mas produkshon. For di Hulanda nos a papia ku Clifton kende a komentá riba e kansion Wat is je Naam ku sigur a dominá e aña aki. Tabata un idea ku Dwight a aserk’é i tabata e momentu apropiá ku a pone e kansion a dal duru. Pero na kuminsamentu di aña tambe Clifton huntu ku Efraim J a saka e kansion “Slow Dance”. I awor aki ta Morena ta riba kartelera musikal.

 

Morena

Morena ta un piesa skibí pa Daniel de Jongh “Dandan”. Ta un eks kolega di e agrupashon musikal Cache. E piesa ei a keda trahá algun aña pasá i Dandan a puntra un amigu ken e ta kere e piesa aki lo zona i e amigu a menshoná Clifton su nòmber. Asina Clifton a keda aserká ku e piesa. Clifton a namorá mesora di Morena. Nan a reprodusí e piesa huntu ku Darren Dinero ku tin un nòmber bon konosí lokal i internashonal. E kalidat di e piesa Morena ta tòp i pa no papia mes di e palabranan ku ta na su lugá. E ta un elogio na muhé en general. ‘Nos ta dediká na morena-nan i e definishon ta tur rasa di muhé, tantu kabei pretu òf maron. Pero e piesa ta dediká na e blònt nan tambe pasobra si nan pinta nan kabei, nan tambe ta un morena’. Clifton a hasi su investigashon di Morena i ounke e tabata sa kaba ku spañónan ta yama un muhé morena ora su kabei ta pretu òf maron, e ta kere ku mester generalisá i involukrá tur rasa di muhé.

 

 

 

Dediká na mi famia

Clifton ta bibando na Hulanda pero el a move bastante na Spaña kaminda el a yega di kanta ku Ebony Power. Manera el a bisa Djasabra, ratu ratu e tabata bai Inglatera i Spaña pa un ke otro evento spesial ku Ebony Power. Pero despues di nasementu di su yu mas grandi, Clifton a disidí di bai Hulanda pa establesé einan teniendo na kuenta ku tabata poko difísil pa biaha aki i aya ku yu. E kier a dediká su tempu mas tantu na su famia.I p’esei tambe e salimentu for di Cache tabata un desishon pa e dediká mas tempu na su famia. I Clifton ta sintié bon i ta disfrutá kada sekònde ku su famia.

 

 

 

Proyekto ku potensial

Pa loke ta di awor padilanti Clifton tin proyektonan ku potensial pa bira grandi. E gusta skohe su kosnan koutelosamente i no ta saka nada pa loko. I tur hende ku konosé sa esei di dje. Su próksimo lansamentu ta dos piesa mas den e ritmo aki pa asina kulminá e periodo di género mas ritmo karibense, pa despues e kambia bèk pa Soul otro aña. For di na Spaña el a hasi Soul i meskos na Inglatera. Aktualmente Clifton ta dedikando su mes na skibi i e tin algun ‘cover’ grabá kla pa sali. Esei nan e lo dal bai kuné na kuminsamentu di otro aña.

Pa awor aki Clifton lo saka un Kizomba mas i un semi regeton spañó ingles. E ta gusta meskla e papiamentu, ingles i spañó den otro.

 

Mas produkshon

Tambe e tim di produkshon ta bezig ku algu na papiamentu. E ta konsistí di ‘cover’ nan di diferente artista di ántes i awor. Clifton a referí na Tony Sherman, Ced Ride (Mi Pais i tin mas na kaminda), Rudy Plaate, Claudius Philips. Ta trata di baluartenan konosí pero ku Clifton ta konsiderá komo su baluartenan tambe pasobra nan ta su ehèmpelnan. Nan a nifiká hopi p’e, nan tabata asta su mentor den su tempunan yòn. Entre otro Mi Pais, Clifton ta kòrda ku e tabata bisti tur na blanku ta kanta. Esei ta algu inolvidabel pe. Meskos ku tin Kanto pa Kòrsou tabatin otro festival i Clifton a representá Kòrsou i Ced Ride a traha “Mi Pais” pa Clifton a kanta. Despues tambe Clifton a kanta e kansion ei algun bia promé ku Ced Ride a pone riba su produkshon algun aña despues. I ku su pèrmit Clifton a poné riba ‘cover’.

 

Mi pais

Mi Pais ta un kansion yen i ta pone bu biba. E ta di gran nifikashon pa Clifton. Promé el a graba e kansion, el a buska ‘footage’ entre otro graba na Boneiru pero misteriosamente esakinan a somentá. Ora el a haña nan bèk ya el a saka e kansion. Mi Pais ta un piesa sumamente bunita i ta bin di un persona grandi den kansion. Pa òktober benidero, Clifton lo finalisá un EP di seis piesa dediká na pais Kòrsou, di kua e promé piesa ta e ‘cover’ di ‘Mi Pais’ originalmente kompositá i kantá pa Ced Ride, ku a sali na 2017. E EP, tentativamente titulá ‘Mi Pais’, porfin lo keda lansá fin di aña, despues di un retraso ku sirkunstansianan rònt di COVID-19 a okashoná.

 

Artistanan hóben dediká na kansionnan di Kòrsou

Clifton a kompartí nos opinion ku hóbennan artista últimamente ta dedikando hopi atenshon na kansionnan di Kòrsou. El a bisa ku  e ta sigui e kansionnan ei i e artistanan tambe i asta esnan ku ta kanta baliabel anochi. ‘No mester lubidá nos rais i nos ta edukadónan, Nos komo kantante ta edukadónan. E mensahe ta drenta mas lihé ku muzik. I p’esei ta importante ku hóbennan i artistanan ta keda mantené nos kansionnan di antaño.

 

Ritmo Soul

E ritmo ku mas ta hala Clifton ta Soul. E ta kòrda tempu el a lanta ku su tata, e ta kòrda LP-nan di soul, jazz i p’esei e tin e rais ei ku tur kaminda ku e bai e por representá e ritmo ei. Algun siman pasá Juny Juliet na Hulanda Clifton tambe a partisipá den un konsierto. E ta kòrda ku nan a trein algun dia promé pero gran parti di loke nan a trein nan no a kanta pero tabata puru improvisá. Clifton ta kòrda e kansion Masquerade di George Benson ta un kansion ku el a lanta semper tende for di na kas i tabata su deseo semper pa kant’e maske ta riba karaoke.  El a hañ’é outomátikamente a kanta e kansion e dia ei. El a bai bèk den rekuerdo ku su tata ku LP nan.

 

Karentena den studio

‘E tempu di vírus Corona aki ta nos tempu pa bai den nos karentena den studio. I nos a probechá’ asina Clifton a bisa. Sin neglishá kas, e ta bai studio asina e tin un chèns i a dediká hopi na skibimentu pa asina e por bin ku un bon produkshon. E no sa ki dia frontera lo habri atrobe pa nos por ta normal riba kaya. P’esei mes mester probechá e tempu aki pa skibi i produsí.

 

Na Kòrsou na novèmber

Pa loke ta su binimentu Kòrsou Clifton a bisa ku esei e no sa ki dia e lo por hasié. Asta el a pensa riba un kansion Maldita Corona (ku un sonrisa riba su kara). E tempu aki tin su pro i su kontra. No solamente kos malu pero kos bon tambe a saka afó. E mes ounke semper e ta dediká tempu na su famia, awor e tin muchu mas tempu. Pero ku poder di Dios Clinfton lo por ta na Kòrsou den luna di novèmber.

 

Hopi yu di Kòrsou positivo

Komo hóben yu di Kòrsou biba na Hulanda i den e mundu artístiko e ta konfirmá ku ta asina e por a ekspandé su mes mas den e ramo aki. I komo tal Clifton ta rekomendá tur hende “E mundu aki ta di nos e ta. Kòrsou ta di nos pero e mundu tambe ta di nos i ma siña atraves di aña ku eksplorando mundu ta amplia bo inteligensia. ‘E ta amplia bo sabiduria tantu musikal komo sosialmente pasobra bo ta haña diferente tipo di pensamentu. Un chines ta pensa otro for di un yu di Kòrsou, un aleman ta pensa otro di un yu Kòrsou i e multikultural i multilingual ku nos ta un bentaha pa mi. Mi por a komuniká mas ku hende i haña mas informashon. Bo komportashon i bo pensamentu ta kambia. I mi por kòrda ku ora mi bin Kòrsou e por hañ’é den un situashon ku ta bin na su mente ku si e no tabata biba afó e lo no a pensa asina”. Tur hende ta biaha pa un propósito, un mihó biba. Den su kaso pa e amplia su konosementu i kanto. I ora ta kritiká e hende ku ta bin Kòrsou pa buska un mihó porvenir e ta kòrda nan ku e tambe a bai Hulanda.

 

No stigmatisá

I na Hulanda por tende hopi kos robes di e yu di Kòrsou pero e grupo mas grandi ta hasiendo kosnan positivo. Tur kos ta dependé di ken bo ta rondia segun Clifton. E stigma di Judeska no ta tur yu di Kòrsou. Tin hopi yu di Kòrsou bon para i den bon kaminda. Tin hopi ku un bida ta drei sin tin di hasi malu manera kisas hopi por ta pensa.


Kòrda pidi Morena

Kòrda pidi pa ‘Morena’ na tur radio emisora i televishon popular di nos islanan i sigui Clifton End riba Facebook/BuzzBinProductions pa keda na altura di futuro aktividat.

Pa entrevista òf presentashon, mail Clifton End na [email protected] pa mas informashon.

Bo por chèk ‘Morena’ riba SPOTIFY https://open.spotify.com/album/3dq5OyEilZgQZAAa4DKDc4

 

 

 

 

 

 

 

LAGA UN KOMENTARIO

Please enter your comment!
Please enter your name here