WILLEMSTAD.- Di manera festivo e siman aki CliniClowns a habri nan “Wall of Fame”. Ku bista riba e Walk of Fame ku ya ta bon konosí pa tur hende, e fundashon a desvelá un muraya den e departamento di mucha di Sehos, ku ta enserá imágennan i informashon riba su payasonan. For di awe e payasonan ku nanishi kòrá lo ta selebridatnan di bèrdat.

Kreashon di e muraya aki tin dos motibu, esei di akuerdo ku Marloes Rooijen, manager di e fundashon. E muraya no ta enserá solamente fotonan grandi di e payasonan, pero tambe kada un tin nan propio bòrchi ku foto i teksto.

Via di e muraya aki e payasonan ta konta kiko ta nan nòmber i kiko por ehèmpel kiko ta nan kuminda faborito, òf loke nan ke bira ora nan bira grandi. Mas aleu tambe nan tur ta hasi un pregunta. Asina pues e muraya ta un parti interaktivo di e departamento unda e muchanan ta keda interná.

Huntu ku nan mayornan nan por kuminsá sera konosí un tiki ku e payasonan, òf disfrutá di e bishita ku e payasonan ta realisá. Kada bes dos payaso ta bini di bishita. Pero danki na e Wall of Fame ku nos chikitinnan por sera konosí tòg ku tur payaso.

Un di dos motibu ta ku, durante e kasi dies añanan ku e fundashon aki tin di eksistensia, diferente payaso a bini i bai. Pero danki na e muraya aki ku e trabou importante ku nan a hasi no ta ser lubidá!

Esnan ku tambe meresé fama ta e spònsernan. E muraya aki a bira posibel danki na e koperashon di kompanianan manera Kooyman BV, AVF Paints, Artview i Creative Blend Imaging. Banda di esei e fundashon ta eksistí kasi dies aña danki na spònsernan manera BDO, Refineria Isla, PRGV 100% Creative, AON i NI Bank ku a kere den e proyekto.

Pa mas informashon riba CliniClowns Curaçao, por bishitá e Facebook CliniClowns Curaçao, òf bèl Marloes na 843-7100.