WILLEMSTAD.- Curaçao Medical Center (CMC) a inougurá djarason último un proyekto spesial ku diseñonan i un historia koutivante pa hasi e departamentu di mucha mas alegre. Den e historia i e pinturanan, e ‘Prikichi’ Dòkter Pedro ta hiba bu na diferente paisahe bunita di Kòrsou i sera bu konosí ku e animalnan ku ta biba aki. E tres organisashonnan ku a uni forsa pa hasi esaki posibel ta Ronald McDonald House Charities (RMHC) Curaçao Foundation, Stichting Mucha pa Mucha i Stichting CliniClowns Curaçao.
Danki na e sosten finansiero di Stichting Johannes Bosco, Fundashon Abram E. Salas, Representashon di Hulanda na Kòrsou i RBC Bank a logra di hasi e proyekto aki posibel. “E Departamentu di Mucha, meskos ku tur departamentu di e hospital, ta trahá den un forma hopi bunita i moderno, pero tabata falta un tiki mas koló pa trese alegria pa e muchanan i nan mayornan. E aspekto aki ta benefisioso durante un estadia den hospital,” segun Claudia Rigaud, direktora di RMHC.
Huntu ku arkitekto Omar Zimmerman (dirigente di e proyekto) i Hirons Caribbean (tim di diseño) a duna forma na e ideanan. “Nos ta hopi orguyoso ku e resultado”, Marina de Miranda, fisioterapista i e ta representá Fundashon Mucha pa Mucha, ta agregá. “Esaki ta sigur un kambio grandi pa nos ku ta traha den kuido i ku tur dia ta aktivo den e Departamentu di Mucha. Nos por usa e murayanan aki na un forma dibertido pa hasi investigashon i ehersisio ku mucha.