WILLEMSTAD.- E tópiko di “Lista di Espera” tambe tabata unu komo parti di deliberashon ayera mainta durante e presentashon di gerensia di CMC den Parlamento. Sr. Gilbert Martina, Direktor General di CMC, a base di su presentashon a mustra ku esaki ta algu ku a evaluá den tur departamento. I si mira esaki a base di normanan ku ta keda stipulá di 30 dia, tin di rekonosé ku algun dje poliklínikanan ku no ta logra kumpli ku esaki. I un di esnan ku ta resaltá ta  e departamento di spesialismo di wowo. Pero segun Martina, e tin splika si ku CMC for di prinsipio di su destinashon, no a pone e spesialismo di wowo komo parti di e instituto aki. E situashon ku a surgi ta ku, na aña 2020 dos di e spesialistanan di wowo ku tabata traha pafó di CMC, ku ta dr. Wiedijk i dr. Abdallah, a bai ku penshun, i konsekuentemente nan portafolio di pashènt, ku tabata algu mas ku 5 mil hende a disidí di akudí na CMC pa tratamentu i kuido, pasobra e otro spesialistanan di wowo tabata yen kaba i no por a tuma mas pashènt. En prinsipio CMC no tabatin plaka reservá den su presupuesto pa duna tratamentu di wowo, pero a hañ’é ta ser kreativo i krea espasio pa por atendé e fluho di pashènt aki.

Mas aleu mester a hasi invershonnan den por ehèmpel aparatonan pa por hasi operashon di wowo (katarata etc.). I trahando ku dos spesialista di wowo aktualmente den CMC, konsiderando e demanda ku tin e no ta sufisiente. E kantidat di pashènt di wowo ta muchu hopi pa e loke merkado tin di ofresé na spesialista. CMC lo mester di mas spesialista di wowo, i esei ta un dje retonan ku e ta konfrontando pa solushoná.

Segun sr. Martina, por bisa ku  e mesun situashon aki tin den e departamento di neurologia unda e demanda ta haltu. Tin un neurólogo ku a fayesé i tin un otro ku ta saliendo for di servisio, pues esaki ta otro reto ku CMC ta luchando kuné.