WILLEMSTAD.- Curaçao Medical Center (CMC) ta eskalá prosesonan interno pa por sigurá kuido di emergensia, agudo i esensial na pashèntnan. Komo resultado di un oumento den kantidat di pashèntnan ku COVID-19 den hòspital, CMC lo mester kanselá algun di e operashonnan elektivo. Tur pashènt ku ta planiá pa atmishon pa risibí tratamentunan elektivo lo risibí un yamada e siman aki si mester kanselá e sita.

CMC ta splika pa tuma nota ku tur sita di poliklínikanan lo sigui normal. Tur pashènt ku bin hòspital pa un sita mester bisti tapa boka i no ta permití entrada na bishita di pashènt sin dokumento di outorisashon ofisial. Ta trata aki di un formulario ku hòspital mester yena pa duna e bishitante akseso na e departamento. Esaki ta un medida ku a keda implementá resientemente. Ta permití solamente 1 bishita pa kada pashènt.

Na tur 47 miembro di personal a tèst positivo for di inisio di e pandemia, di kua awor 27 ta aktivo i 20 a rekuperá. Na e momentunan aki tin 12 pashènt hospitalisá den departamento di COVID-19 i tin indikashon ku 3 pashènt lo por bira sufisiente stabil pa por bai kas. Komo e úniko hospital general di Kòrsou ta di sumo importansia pa CMC por garantisá kuido di emergensia, kuido agudo i kuido esensial na tur momentu. Pa e motibu aki ta nesesario pa kanselá algun di e operashonnan elektivo awor ku tin un oumento di pashènt i miembro di personal ku COVID-19.

CMC ke enfatisá un biaha mas na nos komunidat pa tuma kontakto ku dòkter di kas na momentu ku sinti síntomanan di COVID-19. E úniko manera ku nos por sali for di e situashon ta ku kolaborashon i sosten di nos komunidat. Protehá bo mes i bo famia.