WILLEMSTAD - Pa duna mihó servisio na pashènt i alabes hasi mihó uso di e kapasidat di kama den hòspital, Curaçao Medical Center lo kontinuá ku enfermeria miksto pa loke ta trata estadia di pashènt den departamentu di kuido. Enfermeria miksto ta enserá ku hende hòmber i hende muhé ta drumi den e mesun kamber na e departamento ku e ekspertisio nesesario.

Aña pasá CMC a kuminsá ku un estudio pa analisá e posibilidatnan ku enfermeria miksto ta ofresé. Esaki ta prevení mudansa di pashènt i ta yuda pa por akomodá mas tantu pashènt posibel. Alabes, a pidi reakshon di pashèntnan den e proseso di evaluashon i a sali na kla ku un gran mayoria no ta’tin difikultat ku esaki.

Na momentu ku planifiká e pashènt su estadia na hòspital, e ta wòrdu informá di e posibilidat di enfermeria miksto. CMC ta enfatisá ku ta garantisá privasidat di pashènt den e proseso di komunikashon i tambe den kamber dor di hasi bon uso di kortinanan rònt di kama.