...djabièrnè último un empleado a tèst positivo pa COVID-19...

WILLEMSTAD.- Curaçao Medical Center (CMC) djabièrnè último a konstatá ku un empleado a tèst positivo pa COVID-19. CMC ta tumando vários medidanan stringente konforme protokòl den kolaborashon ku e departamento di higiena i prevenshon. Miéntras tantu ta hasiendo “contact tracing” pa tèst tur persona ku a drenta den kontakto ku e empleado infektá den e último dianan, si ta nesesario e ta konta pa pashèntnan tambe. Na tur persona ku ta sospechá di por a kontagiá ku COVID-19 lo apliká medidanan konforme protokòl di COVID-19.

Asina dr. Jeanne Koeijers, internista i presidente di Outbreak Management Team CMC a bisa djasabra último durante konferensia di prensa di Gobièrnu di Kòrsou. El a splika ku CMC tin ku sigui kuida empleadonan ku na nan turno mester kuida pashèntnan di COVID-19 i pashènt di otro malesa. Tin protokòlnan pa atendé COVID. ‘Bèrdat tin un empleado infektá ku COVID-19. Konforme e protokòl di CMC, na momentu ku e empleado tin síntoma e ta mèldu i ta tèst e, i abase di e resultado ta sigui kana.’

Segun Koeyers,  Departamento di higiena i Arbo ta hasiendo e investigashonnan nesesario den CMC.

‘Si bo tin síntoma di COVID-19 manera keintura, tosamentu òf kansansio, ta enfatisá pa no bin hòspital i yama dòkter di kas inmediatamente.’

Tur sita i tratamentu ta sigui, pero ku medidanan stringente:

-Tur konsulta planiá ta sigui teniendo kuenta ku e medidanan vigente di ‘social distancing’

-Entrada ta solamente na wèst (banda di KFC) i via garashi di parker

-Pa emergensia por drenta di entrada na nòrt (Hamelbergweg/Rodeweg).

-Lo tin kontròl estrikto na entrada pa chèk si tin sita òf si a bin hòspital pa motibu di un emergensia.

-Si mester bin hòspital pa un emergensia i tin keho di keintura haltu, tosamentu òf kansansio, mester bisti mondkapje (tapa boka).

-Lo hasi algun pregunta di akuerdo ku protokòl na entrada di hòspital.

-Lo no por risibí bishita na hòspital te un próksimo aviso.

-Mester apliká distansia sosial.

-Mester presentá 30 minüt promé ku e sita, p’asina tene kuenta ku e reglanan nobo.

Segun Koeyers ‘na momentu ku tin mas informashon, CMC lo proveé esaki pa medio di tur kanal di komunikashon. E salú i seguridat di nos personal, nos pashèntnan i nan famia ta keda e prioridat mas haltu pa CMC.’