CNSJ 2019 lo ta riba dianan 29, 30 i 31 di ougùstùs 2019

WILLEMSTAD.- E tim di produkshon di Curaçao North Sea Jazz resientemente tabata na Kòrsou kaminda nan a reuní ku Fundashon Bon Intenshon pa e di 9 edishon di CNSJ.
‘Nan a bai bèk Ulanda, tur kos ta konosí, tur kos ta kla pa 2019’, esei ta palabranan di Percy Pinedo.
E bosero di Fundashon Bon Intenshon a indiká den un entrevista ku ‘DEN E BEMBE’ ku pa loke ta trata e di 8 edishon ku a tuma lugá e aña aki nan tabatin un tiki problema kuné. ‘Bo kier a wak kiko e ta bai bira despues di 1 aña di pouze. Nos tabatin artista ku nos tabatin konfirmá kaba ku despues a disidí ku nan no ta bini mas. E ora ei a tuma e desishon di trese Daddy Yankee ku a resultá un éksito serka hóbennan i ku a resultá ku benta di karchi a subi’.
No ta promé biaha ku e organisashon ta haña nan konfrontá ku esaki. ‘Ora un artista kanselá ta ‘for better’. Nos tabatin den pasado Prince, Ilan Chester i e aña aki Daddy Yankee.

Bon Zèt!
Definitivamente e di 8 edishon di CNSJ tabata un bon zèt. ‘Si mi tin ku wak bèk, ekonómikamente e tabata un bon zèt pa ekonomia di Kòrsou. E por tabata mas mihó si tabatin mas ‘airlift’ i mas kamber. Pa loke ta trata apartamentu nan a biba i a haña un bon ‘boost’.
E presentashon di Profesor Robertico Croes di Universidat of Central Florida, relashoná ku e spinoff ekonómiko ku e festival a trese pa Kòrsou a papia palabra kla. E partinan positivo di entre otro e kantidat di anochi ku turistanan ta permanesé na Kòrsou i tambe e kantidat di sèn ku ta wòrdu gasta relashoná ku e evento ta impreshonante. E pregunta ku si Gobièrnu, lesa Ofisina di Turismo i Ministerio di Ekonomia, lo kontribuí mas ku e evento. Riba esaki ‘DEN E BEMBE’ a puntra Percy pa su reakshon. ‘Nos a invitá nan na e atardi di informashon kaminda tur hende tabat’ei. Nos a i ta papia ku Ofisina di Turismo. Konforme nan ‘master plan’ ku ta traha pa e mesun Robertico Croes, e parti di ‘Turismo di Evento’ nan mester sigui hasié. Curaçao Airport Partners ta mira e ‘baiben’ di buelonan priva i komersial i nan sa kiko ta e potensial i bon mi ta kere ku Heineken ta hari so nan a keda ta hari. Mi ta kere ku gewon nan ta bini bèk. Bo ta keda ahustá ku nan durante kombersashon i kisas tin posibilidat pa yama bon bini na mas partner’.

FECHANAN
E fechanan pa edishon number 9 di Curaçao North Sea Jazz ta konfirmá. E evento lo tuma lugá riba dianan 29, 30 i 31 di ougùstùs 2019.
Finalisando Percy Pinedo a indiká ku tur kos ta kla pa 2019, nos ta bai tin un tremendo Curaçao North Sea Jazz Festival.

SHARE

LEAVE A REPLY