WILLEMSTAD.- Landhuis Bloemhof ta felisitá Herman van Bergen i su tim ku nan premio CODA Award 2020 den kategoria Landscape, Paisahe.

Hurado di e kategoria Landscape a skohé e obra di arte Katedral di Sumpiña komo ganadó apsoluto.
CODA Award 2020 lo generá hopi atenshon internashonal pa Herman van Bergen, loke lo kumbiní Kòrsou tambe.
CODA Awards ta un inisiativa di Codaworx, un plataforma internashonal ku ta trese arte huntu ku arkitektura, diseño di interior i espasio públiko. E Plataforma ta trese artista i potensial kliente huntu pa entre otro krea obra di arte den espasio públiko. Katedral di Sumpiña lo ta den atenshon internashonal pa un aña largu.

Djamars mèrdia a selebrá e bon notisia aki durante un reunion chikitu den presensia di e artista, su tim i partnernan di Landhuis Bloemhof. Naturalmente a dal un bríndis dilanti Katedral di Sumpiña.

Pa mas informashon: https://www.codaworx.com/2020-codaawards-winners