WILLEMSTAD.- Ora ku internèt kai afó esaki ta sòru pa hopi problema den sektor di salubridat. Awor ku ta pasando tur komunikashon telefóniko riba e sistema di “voice over internet protocol” esaki ta nifiká ku ora internèt kai afó no por komuniká ni via e-mail, ni via telefòn ku pashènt, dòkter òf otro instansianan. Asina parlamentario pa partido PAR, Shaheen Elhage, a trese dilanti durante e ora di pregunta resien riba problemanan ku a surgi ku e kompania Flow.

Despues di e ora di pregunta tabatin problema atrobe den wikènt tras di lomba kaminda internèt a bolbe kai afó na gran parti di Kòrsou pa 12 ora òf mas. Esaki ta lanta e pregunta serka Elhage si un ‘black out’ digital no ta bira un ‘black out’ den kuido ku posibel konsekuensianan fatal. E parlamentario ta bisa ku e ta hasi e pregunta abase di su eksperensia kon kosnan ta funshoná den kuido.

Minister di Tráfiko, Transporte i Planifikashon Urbano, Charles Cooper ta bisa ku e pregunta ta na su lugá. Su pensamentu ta ku lo ta bon pa entidatnan di kuido aboná na mas ku un kompania ku ta duna servisio di internèt. El a duna ehèmpel di su propio kasá ku tambe ta traha den kuido i ku tambe a hasi esaki, esta aboná serka mas ku 1 kompania.

“Di e forma akí ora servisio di un kompania kai afó por usa servisio di e otro kompania.” Segun e minister ta difísil pa gobièrnu regulá algu otro pa e sektor di kuido so. “Despues mas sektor ta bai eksigí mesun kos.”

Cooper ta kere mas bien ku ta na kada entidat ku ta mira sierto riesgonan pa tuma medida nesesario pa evitá esakinan. E minister ta indiká ku e ta komprendé ku e situashon ta fèrfelu pasobra si resultadonan di laboratorio por ehèmpel no ta drenta no por duna guia na e proseso di kuido ku mester tuma lugá. Si tin otro ideanan kon pa atendé ku e situashonnan akí Cooper ta bisa di ta habrí pa skucha esakinan.

Foto:

...Charles Cooper...