Cleopa: Unda ‘nos no ta nan’ a keda?

WILLEMSTAD.- Ta un bèrgwensa ku minister Charles Cooper (MFK)  ta skonde tras di un karta di èks promé minister Eugene Rhuggenaath pa e keda pretendé ku no mester duna parlamento i komunidat informashon riba e dil ku a sera ku Oryx Midstream pa manehá instalashonnan na Bullenbaai i Refineria Isla pa 30 aña. Asina kolaboradó di frakshon di MAN, Eugene Cleopa ta deklará.

Cleopa ta reakshoná riba un mensahe di Cooper riba retnan sosial ku Rhuggenaath a manda un karta pa parlamento mustrando riba klóusula di konfidensialidat den e akuerdo ku a negoshá ku e kompania Klesh. Cleopa ta kuestioná kon Cooper por ta hasi meskos ku eks promé minister si den pasado el a reklamá fuertemente kontra e karta ku e mes ta referí na dje awor.

“Ta hopi bergonsoso pa wak kon Cooper ta usa e mesun karta ku el a krítika fuertemente den pasado i pa bisa ku awor gobièrnu di MFK i PNP no ta duna informashon riba e dil ku a sera ku Oryx Midstream. Ta hustamente Cooper i sobra miembronan di MFK a bisa ku nan ta otro for di e partidonan ku tabata na mando e tempunan ei.”

Cleopa ta sigui kuestioná kon Cooper ta pretendé ku Rhuggenaath a hasi robes den pasado i ku awor e pregunta ta dikon e ta ripití e mesun fayo ku segun e Rhuggenaath a hasi. Banda di esaki Cleopa ta bisa ku Rhuggenaath a presentá den parlamento pa duna informashon riba e negosiashonnan ku Klesh.

“Mi sa esei sigur, pasobra ta ami mes komo parlamentario a sòru pa esaki tuma lugá.” Parlamento asta a haña “inzage” den e kontrato, Cleopa ta sigui bisa.

“Ta a base di e reunion aki i e ‘inzage’ ku Cooper tantu den parlamento komo den prensa a bati e akuerdo ku Klesh kibra bisando ku ke duna Klesh e refineria pa 1 florin. Pero awor vise promé minister Cooper ku ta yama su mes un eksperto den negoshi petrolero, ke skonde tras di un karta di Rhuggenaath pa e no duna informashon riba un dil ku a sera ku un kompania ku su doño ta un ‘salesman’.”

Cleopa ta mustra ku loke mester hasi ta splika votadónan di MFK ku nan a tuma nan hasi. “A primintí e votadónan aki ku lo habri e refineria atrobe. Ta bai hasi 1 luna ku a firma e dil ku Oryx Midstream pa pasa propiedat di komunidat pa Oryx Midstream, pero ainda no por duna informashon na komunidat kiko e dil ta enserá.”

Tambe Cleopa ta bisa ku Cooper mester duna splikashon na tur esnan ku a bai tras di e gritu di “nos no ta nan”, dikon awor e ta skonde tras di un karta di eks promé minister ku den pasado el a reklamá fuertemente kontra dje.

Finalmente e kolaboradó di frakshon di MAN ta mustra ku ta vários persona, manera lider sindikal Wendell Muelen, èks promé minister di Antianan Hulandes Maria Liberia-Peters i abogado Eldon ‘Peppie’ Sulvaran a krítika e manera kon gobièrnu a yega na e dil aki. “Asta siguidónan di MFK a kuminsá reklamá públikamente ku nan ta fadá ku e manera ku e gobièrnu aktual ta atendé ku asuntunan inkluso asuntunan ku ta di interes general manera nos refineria.”

Segun Cleopa Cooper na lugá di ataká nan tur hendenan aki personalmente, mester bai splika nan dikon e ta skonde tras di un karta di èks promé minister Rhuggenaath. “Bai splika tambe ku Oryx Midstream no a haña e terenonan di e terminal di zeta i refineria Isla den ‘erfpacht’ i kiko e kompania ta pone komo ‘onderpand’ na momento ku buska finansiamentu pa su proyektonan. “Shame on you”, Cleopa ta terminá bisando.

Foto:

...Eugene Cleopa...